8Zechariah 8

1ויהי דבר יהוה צבאות לאמרSelect Zechariah 8:1

2כה אמר יהוה צבאות קנאתי לציון קנאה גדולה וחמה גדולה קנאתי להSelect Zechariah 8:2

3כה אמר יהוה שבתי אל ציון ושכנתי בתוך ירושלם ונקראה ירושלם עיר האמת והר יהוה צבאות הר הקדשSelect Zechariah 8:3

4כה אמר יהוה צבאות עד ישבו זקנים וזקנות ברחבות ירושלם ואיש משענתו בידו מרב ימיםSelect Zechariah 8:4

5ורחבות העיר ימלאו ילדים וילדות משחקים ברחבתיהSelect Zechariah 8:5

6כה אמר יהוה צבאות כי יפלא בעיני שארית העם הזה בימים ההם—גם בעיני יפלא נאם יהוה צבאותSelect Zechariah 8:6

7כה אמר יהוה צבאות הנני מושיע את עמי מארץ מזרח ומארץ מבוא השמשSelect Zechariah 8:7

8והבאתי אתם ושכנו בתוך ירושלם והיו לי לעם ואני אהיה להם לאלהים—באמת ובצדקהSelect Zechariah 8:8

9כה אמר יהוה צבאות תחזקנה ידיכם השמעים בימים האלה את הדברים האלה—מפי הנביאים אשר ביום יסד בית יהוה צבאות ההיכל להבנותSelect Zechariah 8:9

10כי לפני הימים ההם שכר האדם לא נהיה ושכר הבהמה איננה וליוצא ולבא אין שלום מן הצר ואשלח את כל האדם איש ברעהוSelect Zechariah 8:10

11ועתה לא כימים הראשנים אני לשארית העם הזה—נאם יהוה צבאותSelect Zechariah 8:11

12כי זרע השלום הגפן תתן פריה והארץ תתן את יבולה והשמים יתנו טלם והנחלתי את שארית העם הזה—את כל אלהSelect Zechariah 8:12

13והיה כאשר הייתם קללה בגוים בית יהודה ובית ישראל—כן אושיע אתכם והייתם ברכה אל תיראו תחזקנה ידיכםSelect Zechariah 8:13

14כי כה אמר יהוה צבאות כאשר זממתי להרע לכם בהקציף אבתיכם אתי אמר יהוה צבאות ולא נחמתיSelect Zechariah 8:14

15כן שבתי זממתי בימים האלה להיטיב את ירושלם ואת בית יהודה אל תיראוSelect Zechariah 8:15

16אלה הדברים אשר תעשו דברו אמת איש את רעהו—אמת ומשפט שלום שפטו בשעריכםSelect Zechariah 8:16

17ואיש את רעת רעהו אל תחשבו בלבבכם ושבעת שקר אל תאהבו כי את כל אלה אשר שנאתי נאם יהוהSelect Zechariah 8:17

18ויהי דבר יהוה צבאות אלי לאמרSelect Zechariah 8:18

19כה אמר יהוה צבאות צום הרביעי וצום החמישי וצום השביעי וצום העשירי יהיה לבית יהודה לששון ולשמחה ולמעדים טובים והאמת והשלום אהבוSelect Zechariah 8:19

20כה אמר יהוה צבאות עד אשר יבאו עמים וישבי ערים רבותSelect Zechariah 8:20

21והלכו יושבי אחת אל אחת לאמר נלכה הלוך לחלות את פני יהוה ולבקש את יהוה צבאות אלכה גם אניSelect Zechariah 8:21

22ובאו עמים רבים וגוים עצומים לבקש את יהוה צבאות בירושלם ולחלות את פני יהוהSelect Zechariah 8:22

23כה אמר יהוה צבאות בימים ההמה אשר יחזיקו עשרה אנשים מכל לשנות הגוים והחזיקו בכנף איש יהודי לאמר נלכה עמכם—כי שמענו אלהים עמכםSelect Zechariah 8:23