30Deuteronomy 30

1והיה כי יבאו עליך כל הדברים האלה הברכה והקללה אשר נתתי לפניך והשבת אל לבבך בכל הגוים אשר הדיחך יהוה אלהיך שמהSelect Deuteronomy 30:1

2ושבת עד יהוה אלהיך ושמעת בקלו ככל אשר אנכי מצוך היום אתה ובניך בכל לבבך ובכל נפשךSelect Deuteronomy 30:2

3ושב יהוה אלהיך את שבותך ורחמך ושב וקבצך מכל העמים אשר הפיצך יהוה אלהיך שמהSelect Deuteronomy 30:3

4אם יהיה נדחך בקצה השמים—משם יקבצך יהוה אלהיך ומשם יקחךSelect Deuteronomy 30:4

5והביאך יהוה אלהיך אל הארץ אשר ירשו אבתיך—וירשתה והיטבך והרבך מאבתיךSelect Deuteronomy 30:5

6ומל יהוה אלהיך את לבבך ואת לבב זרעך לאהבה את יהוה אלהיך בכל לבבך ובכל נפשך—למען חייךSelect Deuteronomy 30:6

7ונתן יהוה אלהיך את כל האלות האלה על איביך ועל שנאיך אשר רדפוךSelect Deuteronomy 30:7

8ואתה תשוב ושמעת בקול יהוה ועשית את כל מצותיו אשר אנכי מצוך היוםSelect Deuteronomy 30:8

9והותירך יהוה אלהיך בכל מעשה ידך בפרי בטנך ובפרי בהמתך ובפרי אדמתך—לטבה כי ישוב יהוה לשוש עליך לטוב כאשר שש על אבתיךSelect Deuteronomy 30:9

10כי תשמע בקול יהוה אלהיך לשמר מצותיו וחקתיו הכתובה בספר התורה הזה כי תשוב אל יהוה אלהיך בכל לבבך ובכל נפשךSelect Deuteronomy 30:10

11כי המצוה הזאת אשר אנכי מצוך היום—לא נפלאת הוא ממך ולא רחקה הואSelect Deuteronomy 30:11

12לא בשמים הוא לאמר מי יעלה לנו השמימה ויקחה לנו וישמענו אתה ונעשנהSelect Deuteronomy 30:12

13ולא מעבר לים הוא לאמר מי יעבר לנו אל עבר הים ויקחה לנו וישמענו אתה ונעשנהSelect Deuteronomy 30:13

14כי קרוב אליך הדבר מאד בפיך ובלבבך לעשתוSelect Deuteronomy 30:14

15ראה נתתי לפניך היום את החיים ואת הטוב ואת המות ואת הרעSelect Deuteronomy 30:15

16אשר אנכי מצוך היום לאהבה את יהוה אלהיך ללכת בדרכיו ולשמר מצותיו וחקתיו ומשפטיו וחיית ורבית—וברכך יהוה אלהיך בארץ אשר אתה בא שמה לרשתהSelect Deuteronomy 30:16

17ואם יפנה לבבך ולא תשמע ונדחת והשתחוית לאלהים אחרים—ועבדתםSelect Deuteronomy 30:17

18הגדתי לכם היום כי אבד תאבדון לא תאריכן ימים על האדמה אשר אתה עבר את הירדן לבוא שמה לרשתהSelect Deuteronomy 30:18

19העדתי בכם היום את השמים ואת הארץ—החיים והמות נתתי לפניך הברכה והקללה ובחרת בחיים—למען תחיה אתה וזרעךSelect Deuteronomy 30:19

20לאהבה את יהוה אלהיך לשמע בקלו ולדבקה בו כי הוא חייך וארך ימיך—לשבת על האדמה אשר נשבע יהוה לאבתיך לאברהם ליצחק וליעקב לתת להםSelect Deuteronomy 30:20