6Joshua 6

1ויריחו סגרת ומסגרת מפני בני ישראל אין יוצא ואין באSelect Joshua 6:1

2ויאמר יהוה אל יהושע ראה נתתי בידך את יריחו ואת מלכה—גבורי החילSelect Joshua 6:2

3וסבתם את העיר כל אנשי המלחמה—הקיף את העיר פעם אחת כה תעשה ששת ימיםSelect Joshua 6:3

4ושבעה כהנים ישאו שבעה שופרות היובלים לפני הארון וביום השביעי תסבו את העיר שבע פעמים והכהנים יתקעו בשופרותSelect Joshua 6:4

5והיה במשך בקרן היובל בשמעכם (כשמעכם) את קול השופר יריעו כל העם תרועה גדולה ונפלה חומת העיר תחתיה ועלו העם איש נגדוSelect Joshua 6:5

6ויקרא יהושע בן נון אל הכהנים ויאמר אלהם שאו את ארון הברית ושבעה כהנים ישאו שבעה שופרות יובלים לפני ארון יהוהSelect Joshua 6:6

7ויאמרו (ויאמר) אל העם עברו וסבו את העיר והחלוץ—יעבר לפני ארון יהוהSelect Joshua 6:7

8ויהי כאמר יהושע אל העם ושבעה הכהנים נשאים שבעה שופרות היובלים לפני יהוה עברו ותקעו בשופרות וארון ברית יהוה הלך אחריהםSelect Joshua 6:8

9והחלוץ הלך—לפני הכהנים תקעו (תקעי) השופרות והמאסף הלך אחרי הארון הלוך ותקוע בשופרותSelect Joshua 6:9

10ואת העם צוה יהושע לאמר לא תריעו ולא תשמיעו את קולכם ולא יצא מפיכם דבר עד יום אמרי אליכם הריעו—והריעתםSelect Joshua 6:10

11ויסב ארון יהוה את העיר הקף פעם אחת ויבאו המחנה וילינו במחנהSelect Joshua 6:11

12וישכם יהושע בבקר וישאו הכהנים את ארון יהוהSelect Joshua 6:12

13ושבעה הכהנים נשאים שבעה שופרות היבלים לפני ארון יהוה הלכים הלוך ותקעו בשופרות והחלוץ הלך לפניהם והמאסף הלך אחרי ארון יהוה הולך (הלוך) ותקוע בשופרותSelect Joshua 6:13

14ויסבו את העיר ביום השני פעם אחת וישבו המחנה כה עשו ששת ימיםSelect Joshua 6:14

15ויהי ביום השביעי וישכמו כעלות השחר ויסבו את העיר כמשפט הזה שבע פעמים רק ביום ההוא סבבו את העיר שבע פעמיםSelect Joshua 6:15

16ויהי בפעם השביעית תקעו הכהנים בשופרות ויאמר יהושע אל העם הריעו כי נתן יהוה לכם את העירSelect Joshua 6:16

17והיתה העיר חרם היא וכל אשר בה ליהוה רק רחב הזונה תחיה היא וכל אשר אתה בבית—כי החבאתה את המלאכים אשר שלחנוSelect Joshua 6:17

18ורק אתם שמרו מן החרם פן תחרימו ולקחתם מן החרם ושמתם את מחנה ישראל לחרם ועכרתם אותוSelect Joshua 6:18

19וכל כסף וזהב וכלי נחשת וברזל—קדש הוא ליהוה אוצר יהוה יבואSelect Joshua 6:19

20וירע העם ויתקעו בשפרות ויהי כשמע העם את קול השופר ויריעו העם תרועה גדולה ותפל החומה תחתיה ויעל העם העירה איש נגדו וילכדו את העירSelect Joshua 6:20

21ויחרימו את כל אשר בעיר מאיש ועד אשה מנער ועד זקן ועד שור ושה וחמור לפי חרבSelect Joshua 6:21

22ולשנים האנשים המרגלים את הארץ אמר יהושע באו בית האשה הזונה והוציאו משם את האשה ואת כל אשר לה כאשר נשבעתם להSelect Joshua 6:22

23ויבאו הנערים המרגלים ויציאו את רחב ואת אביה ואת אמה ואת אחיה ואת כל אשר לה ואת כל משפחותיה הוציאו ויניחום—מחוץ למחנה ישראלSelect Joshua 6:23

24והעיר שרפו באש וכל אשר בה רק הכסף והזהב וכלי הנחשת והברזל—נתנו אוצר בית יהוהSelect Joshua 6:24

25ואת רחב הזונה ואת בית אביה ואת כל אשר לה החיה יהושע ותשב בקרב ישראל עד היום הזה כי החביאה את המלאכים אשר שלח יהושע לרגל את יריחוSelect Joshua 6:25

26וישבע יהושע בעת ההיא לאמר ארור האיש לפני יהוה אשר יקום ובנה את העיר הזאת את יריחו—בבכרו ייסדנה ובצעירו יציב דלתיהSelect Joshua 6:26

27ויהי יהוה את יהושע ויהי שמעו בכל הארץSelect Joshua 6:27