17Jeremiah 17

1חטאת יהודה כתובה בעט ברזל—בצפרן שמיר חרושה על לוח לבם ולקרנות מזבחותיכםSelect Jeremiah 17:1

2כזכר בניהם מזבחותם ואשריהם על עץ רענן על גבעות הגבהותSelect Jeremiah 17:2

3הררי בשדה—חילך כל אוצרותיך לבז אתן במתיך בחטאת בכל גבוליךSelect Jeremiah 17:3

4ושמטתה ובך מנחלתך אשר נתתי לך והעבדתיך את איביך בארץ אשר לא ידעת כי אש קדחתם באפי עד עולם תוקדSelect Jeremiah 17:4

5כה אמר יהוה ארור הגבר אשר יבטח באדם ושם בשר זרעו ומן יהוה יסור לבוSelect Jeremiah 17:5

6והיה כערער בערבה ולא יראה כי יבוא טוב ושכן חררים במדבר ארץ מלחה ולא תשבSelect Jeremiah 17:6

7ברוך הגבר אשר יבטח ביהוה והיה יהוה מבטחוSelect Jeremiah 17:7

8והיה כעץ שתול על מים ועל יובל ישלח שרשיו ולא ירא (יראה) כי יבא חם והיה עלהו רענן ובשנת בצרת לא ידאג ולא ימיש מעשות פריSelect Jeremiah 17:8

9עקב הלב מכל ואנש הוא מי ידענוSelect Jeremiah 17:9

10אני יהוה חקר לב בחן כליות ולתת לאיש כדרכו כפרי מעלליוSelect Jeremiah 17:10

11קרא דגר ולא ילד עשה עשר ולא במשפט בחצי ימו יעזבנו ובאחריתו יהיה נבלSelect Jeremiah 17:11

12כסא כבוד מרום מראשון—מקום מקדשנוSelect Jeremiah 17:12

13מקוה ישראל יהוה כל עזביך יבשו יסורי (וסורי) בארץ יכתבו כי עזבו מקור מים חיים את יהוהSelect Jeremiah 17:13

14רפאני יהוה וארפא הושיעני ואושעה כי תהלתי אתהSelect Jeremiah 17:14

15הנה המה אמרים אלי איה דבר יהוה יבוא נאSelect Jeremiah 17:15

16ואני לא אצתי מרעה אחריך ויום אנוש לא התאויתי—אתה ידעת מוצא שפתי נכח פניך היהSelect Jeremiah 17:16

17אל תהיה לי למחתה מחסי אתה ביום רעהSelect Jeremiah 17:17

18יבשו רדפי ואל אבשה אני—יחתו המה ואל אחתה אני הביא עליהם יום רעה ומשנה שברון שברםSelect Jeremiah 17:18

19כה אמר יהוה אלי הלך ועמדת בשער בני עם (העם) אשר יבאו בו מלכי יהודה ואשר יצאו בו ובכל שערי ירושלםSelect Jeremiah 17:19

20ואמרת אליהם שמעו דבר יהוה מלכי יהודה וכל יהודה וכל ישבי ירושלם—הבאים בשערים האלהSelect Jeremiah 17:20

21כה אמר יהוה השמרו בנפשותיכם ואל תשאו משא ביום השבת והבאתם בשערי ירושלםSelect Jeremiah 17:21

22ולא תוציאו משא מבתיכם ביום השבת וכל מלאכה לא תעשו וקדשתם את יום השבת כאשר צויתי את אבותיכםSelect Jeremiah 17:22

23ולא שמעו ולא הטו את אזנם ויקשו את ערפם לבלתי שומע (שמוע) ולבלתי קחת מוסרSelect Jeremiah 17:23

24והיה אם שמע תשמעון אלי נאם יהוה לבלתי הביא משא בשערי העיר הזאת ביום השבת ולקדש את יום השבת לבלתי עשות בה כל מלאכהSelect Jeremiah 17:24

25ובאו בשערי העיר הזאת מלכים ושרים ישבים על כסא דוד רכבים ברכב ובסוסים המה ושריהם—איש יהודה וישבי ירושלם וישבה העיר הזאת לעולםSelect Jeremiah 17:25

26ובאו מערי יהודה ומסביבות ירושלם ומארץ בנימן ומן השפלה ומן ההר ומן הנגב מבאים עולה וזבח ומנחה ולבונה—ומבאי תודה בית יהוהSelect Jeremiah 17:26

27ואם לא תשמעו אלי לקדש את יום השבת ולבלתי שאת משא ובא בשערי ירושלם ביום השבת והצתי אש בשעריה ואכלה ארמנות ירושלם—ולא תכבהSelect Jeremiah 17:27