18Genesis 18

1וירא אליו יהוה באלני ממרא והוא ישב פתח האהל כחם היוםSelect Genesis 18:1

2וישא עיניו וירא והנה שלשה אנשים נצבים עליו וירא וירץ לקראתם מפתח האהל וישתחו ארצהSelect Genesis 18:2

3ויאמר אדני אם נא מצאתי חן בעיניך—אל נא תעבר מעל עבדךSelect Genesis 18:3

4יקח נא מעט מים ורחצו רגליכם והשענו תחת העץSelect Genesis 18:4

5ואקחה פת לחם וסעדו לבכם אחר תעברו—כי על כן עברתם על עבדכם ויאמרו כן תעשה כאשר דברתSelect Genesis 18:5

6וימהר אברהם האהלה אל שרה ויאמר מהרי שלש סאים קמח סלת—לושי ועשי עגותSelect Genesis 18:6

7ואל הבקר רץ אברהם ויקח בן בקר רך וטוב ויתן אל הנער וימהר לעשות אתוSelect Genesis 18:7

8ויקח חמאה וחלב ובן הבקר אשר עשה ויתן לפניהם והוא עמד עליהם תחת העץ ויאכלוSelect Genesis 18:8

9ויאמרו אליו איה שרה אשתך ויאמר הנה באהלSelect Genesis 18:9

10ויאמר שוב אשוב אליך כעת חיה והנה בן לשרה אשתך ושרה שמעת פתח האהל והוא אחריוSelect Genesis 18:10

11ואברהם ושרה זקנים באים בימים חדל להיות לשרה ארח כנשיםSelect Genesis 18:11

12ותצחק שרה בקרבה לאמר אחרי בלתי היתה לי עדנה ואדני זקןSelect Genesis 18:12

13ויאמר יהוה אל אברהם למה זה צחקה שרה לאמר האף אמנם אלד—ואני זקנתיSelect Genesis 18:13

14היפלא מיהוה דבר למועד אשוב אליך כעת חיה—ולשרה בןSelect Genesis 18:14

15ותכחש שרה לאמר לא צחקתי כי יראה ויאמר לא כי צחקתSelect Genesis 18:15

16ויקמו משם האנשים וישקפו על פני סדם ואברהם—הלך עמם לשלחםSelect Genesis 18:16

17ויהוה אמר המכסה אני מאברהם אשר אני עשהSelect Genesis 18:17

18ואברהם—היו יהיה לגוי גדול ועצום ונברכו בו—כל גויי הארץSelect Genesis 18:18

19כי ידעתיו למען אשר יצוה את בניו ואת ביתו אחריו ושמרו דרך יהוה לעשות צדקה ומשפט—למען הביא יהוה על אברהם את אשר דבר עליוSelect Genesis 18:19

20ויאמר יהוה זעקת סדם ועמרה כי רבה וחטאתם—כי כבדה מאדSelect Genesis 18:20

21ארדה נא ואראה הכצעקתה הבאה אלי עשו כלה ואם לא אדעהSelect Genesis 18:21

22ויפנו משם האנשים וילכו סדמה ואברהם—עודנו עמד לפני יהוהSelect Genesis 18:22

23ויגש אברהם ויאמר האף תספה צדיק עם רשעSelect Genesis 18:23

24אולי יש חמשים צדיקם בתוך העיר האף תספה ולא תשא למקום למען חמשים הצדיקם אשר בקרבהSelect Genesis 18:24

25חללה לך מעשת כדבר הזה להמית צדיק עם רשע והיה כצדיק כרשע חללה לך—השפט כל הארץ לא יעשה משפטSelect Genesis 18:25

26ויאמר יהוה אם אמצא בסדם חמשים צדיקם בתוך העיר—ונשאתי לכל המקום בעבורםSelect Genesis 18:26

27ויען אברהם ויאמר הנה נא הואלתי לדבר אל אדני ואנכי עפר ואפרSelect Genesis 18:27

28אולי יחסרון חמשים הצדיקם חמשה—התשחית בחמשה את כל העיר ויאמר לא אשחית אם אמצא שם ארבעים וחמשהSelect Genesis 18:28

29ויסף עוד לדבר אליו ויאמר אולי ימצאון שם ארבעים ויאמר לא אעשה בעבור הארבעיםSelect Genesis 18:29

30ויאמר אל נא יחר לאדני ואדברה—אולי ימצאון שם שלשים ויאמר לא אעשה אם אמצא שם שלשיםSelect Genesis 18:30

31ויאמר הנה נא הואלתי לדבר אל אדני—אולי ימצאון שם עשרים ויאמר לא אשחית בעבור העשריםSelect Genesis 18:31

32ויאמר אל נא יחר לאדני ואדברה אך הפעם—אולי ימצאון שם עשרה ויאמר לא אשחית בעבור העשרהSelect Genesis 18:32

33וילך יהוה—כאשר כלה לדבר אל אברהם ואברהם שב למקמוSelect Genesis 18:33