4Genesis 4

1והאדם ידע את חוה אשתו ותהר ותלד את קין ותאמר קניתי איש את יהוהSelect Genesis 4:1

2ותסף ללדת את אחיו את הבל ויהי הבל רעה צאן וקין היה עבד אדמהSelect Genesis 4:2

3ויהי מקץ ימים ויבא קין מפרי האדמה מנחה—ליהוהSelect Genesis 4:3

4והבל הביא גם הוא מבכרות צאנו ומחלבהן וישע יהוה אל הבל ואל מנחתוSelect Genesis 4:4

5ואל קין ואל מנחתו לא שעה ויחר לקין מאד ויפלו פניוSelect Genesis 4:5

6ויאמר יהוה אל קין למה חרה לך ולמה נפלו פניךSelect Genesis 4:6

7הלוא אם תיטיב שאת ואם לא תיטיב לפתח חטאת רבץ ואליך תשוקתו ואתה תמשל בוSelect Genesis 4:7

8ויאמר קין אל הבל אחיו ויהי בהיותם בשדה ויקם קין אל הבל אחיו ויהרגהוSelect Genesis 4:8

9ויאמר יהוה אל קין אי הבל אחיך ויאמר לא ידעתי השמר אחי אנכיSelect Genesis 4:9

10ויאמר מה עשית קול דמי אחיך צעקים אלי מן האדמהSelect Genesis 4:10

11ועתה ארור אתה מן האדמה אשר פצתה את פיה לקחת את דמי אחיך מידךSelect Genesis 4:11

12כי תעבד את האדמה לא תסף תת כחה לך נע ונד תהיה בארץSelect Genesis 4:12

13ויאמר קין אל יהוה גדול עוני מנשאSelect Genesis 4:13

14הן גרשת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגניSelect Genesis 4:14

15ויאמר לו יהוה לכן כל הרג קין שבעתים יקם וישם יהוה לקין אות לבלתי הכות אתו כל מצאוSelect Genesis 4:15

16ויצא קין מלפני יהוה וישב בארץ נוד קדמת עדןSelect Genesis 4:16

17וידע קין את אשתו ותהר ותלד את חנוך ויהי בנה עיר ויקרא שם העיר כשם בנו חנוךSelect Genesis 4:17

18ויולד לחנוך את עירד ועירד ילד את מחויאל ומחייאל ילד את מתושאל ומתושאל ילד את למךSelect Genesis 4:18

19ויקח לו למך שתי נשים שם האחת עדה ושם השנית צלהSelect Genesis 4:19

20ותלד עדה את יבל הוא היה—אבי ישב אהל ומקנהSelect Genesis 4:20

21ושם אחיו יובל הוא היה—אבי כל תפש כנור ועוגבSelect Genesis 4:21

22וצלה גם הוא ילדה את תובל קין—לטש כל חרש נחשת וברזל ואחות תובל קין נעמהSelect Genesis 4:22

23ויאמר למך לנשיו עדה וצלה שמען קולי—נשי למך האזנה אמרתי כי איש הרגתי לפצעי וילד לחברתיSelect Genesis 4:23

24כי שבעתים יקם קין ולמך שבעים ושבעהSelect Genesis 4:24

25וידע אדם עוד את אשתו ותלד בן ותקרא את שמו שת כי שת לי אלהים זרע אחר—תחת הבל כי הרגו קיןSelect Genesis 4:25

26ולשת גם הוא ילד בן ויקרא את שמו אנוש אז הוחל לקרא בשם יהוהSelect Genesis 4:26