32Exodus 32

1וירא העם כי בשש משה לרדת מן ההר ויקהל העם על אהרן ויאמרו אליו קום עשה לנו אלהים אשר ילכו לפנינו—כי זה משה האיש אשר העלנו מארץ מצרים לא ידענו מה היה לוSelect Exodus 32:1

2ויאמר אלהם אהרן פרקו נזמי הזהב אשר באזני נשיכם בניכם ובנתיכם והביאו אליSelect Exodus 32:2

3ויתפרקו כל העם את נזמי הזהב אשר באזניהם ויביאו אל אהרןSelect Exodus 32:3

4ויקח מידם ויצר אתו בחרט ויעשהו עגל מסכה ויאמרו—אלה אלהיך ישראל אשר העלוך מארץ מצריםSelect Exodus 32:4

5וירא אהרן ויבן מזבח לפניו ויקרא אהרן ויאמר חג ליהוה מחרSelect Exodus 32:5

6וישכימו ממחרת ויעלו עלת ויגשו שלמים וישב העם לאכל ושתו ויקמו לצחקSelect Exodus 32:6

7וידבר יהוה אל משה לך רד—כי שחת עמך אשר העלית מארץ מצריםSelect Exodus 32:7

8סרו מהר מן הדרך אשר צויתם—עשו להם עגל מסכה וישתחוו לו ויזבחו לו ויאמרו אלה אלהיך ישראל אשר העלוך מארץ מצריםSelect Exodus 32:8

9ויאמר יהוה אל משה ראיתי את העם הזה והנה עם קשה ערף הואSelect Exodus 32:9

10ועתה הניחה לי ויחר אפי בהם ואכלם ואעשה אותך לגוי גדולSelect Exodus 32:10

11ויחל משה את פני יהוה אלהיו ויאמר למה יהוה יחרה אפך בעמך אשר הוצאת מארץ מצרים בכח גדול וביד חזקהSelect Exodus 32:11

12למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שוב מחרון אפך והנחם על הרעה לעמךSelect Exodus 32:12

13זכר לאברהם ליצחק ולישראל עבדיך אשר נשבעת להם בך ותדבר אלהם ארבה את זרעכם ככוכבי השמים וכל הארץ הזאת אשר אמרתי אתן לזרעכם ונחלו לעלםSelect Exodus 32:13

14וינחם יהוה על הרעה אשר דבר לעשות לעמוSelect Exodus 32:14

15ויפן וירד משה מן ההר ושני לחת העדת בידו לחת כתבים משני עבריהם—מזה ומזה הם כתביםSelect Exodus 32:15

16והלחת—מעשה אלהים המה והמכתב מכתב אלהים הוא—חרות על הלחתSelect Exodus 32:16

17וישמע יהושע את קול העם ברעה ויאמר אל משה קול מלחמה במחנהSelect Exodus 32:17

18ויאמר אין קול ענות גבורה ואין קול ענות חלושה קול ענות אנכי שמעSelect Exodus 32:18

19ויהי כאשר קרב אל המחנה וירא את העגל ומחלת ויחר אף משה וישלך מידו את הלחת וישבר אתם תחת ההרSelect Exodus 32:19

20ויקח את העגל אשר עשו וישרף באש ויטחן עד אשר דק ויזר על פני המים וישק את בני ישראלSelect Exodus 32:20

21ויאמר משה אל אהרן מה עשה לך העם הזה כי הבאת עליו חטאה גדלהSelect Exodus 32:21

22ויאמר אהרן אל יחר אף אדני אתה ידעת את העם כי ברע הואSelect Exodus 32:22

23ויאמרו לי—עשה לנו אלהים אשר ילכו לפנינו כי זה משה האיש אשר העלנו מארץ מצרים—לא ידענו מה היה לוSelect Exodus 32:23

24ואמר להם למי זהב התפרקו ויתנו לי ואשלכהו באש ויצא העגל הזהSelect Exodus 32:24

25וירא משה את העם כי פרע הוא כי פרעה אהרן לשמצה בקמיהםSelect Exodus 32:25

26ויעמד משה בשער המחנה ויאמר מי ליהוה אלי ויאספו אליו כל בני לויSelect Exodus 32:26

27ויאמר להם כה אמר יהוה אלהי ישראל שימו איש חרבו על ירכו עברו ושובו משער לשער במחנה והרגו איש את אחיו ואיש את רעהו ואיש את קרבוSelect Exodus 32:27

28ויעשו בני לוי כדבר משה ויפל מן העם ביום ההוא כשלשת אלפי אישSelect Exodus 32:28

29ויאמר משה מלאו ידכם היום ליהוה כי איש בבנו ובאחיו—ולתת עליכם היום ברכהSelect Exodus 32:29

30ויהי ממחרת ויאמר משה אל העם אתם חטאתם חטאה גדלה ועתה אעלה אל יהוה אולי אכפרה בעד חטאתכםSelect Exodus 32:30

31וישב משה אל יהוה ויאמר אנא חטא העם הזה חטאה גדלה ויעשו להם אלהי זהבSelect Exodus 32:31

32ועתה אם תשא חטאתם ואם אין—מחני נא מספרך אשר כתבתSelect Exodus 32:32

33ויאמר יהוה אל משה מי אשר חטא לי אמחנו מספריSelect Exodus 32:33

34ועתה לך נחה את העם אל אשר דברתי לך—הנה מלאכי ילך לפניך וביום פקדי ופקדתי עלהם חטאתםSelect Exodus 32:34

35ויגף יהוה את העם על אשר עשו את העגל אשר עשה אהרןSelect Exodus 32:35