1 Kings 13
Aleppo Codex
Translation: ALEPPO
Modern translations such as the NIV or ESV are not available yet. They need a license, and we will add them when one is in place. All translations and their sources
1והנה איש אלהים בא מיהודה בדבר יהוה—אל בית אל וירבעם עמד על המזבח להקטירSelect 1 Kings 13:1
2ויקרא על המזבח בדבר יהוה ויאמר מזבח מזבח כה אמר יהוה הנה בן נולד לבית דוד יאשיהו שמו וזבח עליך את כהני הבמות המקטרים עליך ועצמות אדם ישרפו עליךSelect 1 Kings 13:2
3ונתן ביום ההוא מופת לאמר זה המופת אשר דבר יהוה הנה המזבח נקרע ונשפך הדשן אשר עליוSelect 1 Kings 13:3
4ויהי כשמע המלך את דבר איש האלהים אשר קרא על המזבח בבית אל וישלח ירבעם את ידו מעל המזבח לאמר תפשהו ותיבש ידו אשר שלח עליו ולא יכל להשיבה אליוSelect 1 Kings 13:4
5והמזבח נקרע וישפך הדשן מן המזבח כמופת אשר נתן איש האלהים—בדבר יהוהSelect 1 Kings 13:5
6ויען המלך ויאמר אל איש האלהים חל נא את פני יהוה אלהיך והתפלל בעדי ותשב ידי אלי ויחל איש האלהים את פני יהוה ותשב יד המלך אליו ותהי כבראשנהSelect 1 Kings 13:6
7וידבר המלך אל איש האלהים באה אתי הביתה וסעדה ואתנה לך מתתSelect 1 Kings 13:7
8ויאמר איש האלהים אל המלך אם תתן לי את חצי ביתך לא אבא עמך ולא אכל לחם ולא אשתה מים במקום הזהSelect 1 Kings 13:8
9כי כן צוה אתי בדבר יהוה לאמר לא תאכל לחם ולא תשתה מים ולא תשוב בדרך אשר הלכתSelect 1 Kings 13:9
10וילך בדרך אחר ולא שב בדרך אשר בא בה אל בית אלSelect 1 Kings 13:10
11ונביא אחד זקן ישב בבית אל ויבוא בנו ויספר לו את כל המעשה אשר עשה איש האלהים היום בבית אל את הדברים אשר דבר אל המלך ויספרום לאביהםSelect 1 Kings 13:11
12וידבר אלהם אביהם אי זה הדרך הלך ויראו בניו את הדרך אשר הלך איש האלהים אשר בא מיהודהSelect 1 Kings 13:12
13ויאמר אל בניו חבשו לי החמור ויחבשו לו החמור וירכב עליוSelect 1 Kings 13:13
14וילך אחרי איש האלהים וימצאהו ישב תחת האלה ויאמר אליו האתה איש האלהים אשר באת מיהודה—ויאמר אניSelect 1 Kings 13:14
15ויאמר אליו לך אתי הביתה ואכל לחםSelect 1 Kings 13:15
16ויאמר לא אוכל לשוב אתך—ולבוא אתך ולא אכל לחם ולא אשתה אתך מים במקום הזהSelect 1 Kings 13:16
17כי דבר אלי בדבר יהוה לא תאכל לחם ולא תשתה שם מים לא תשוב ללכת בדרך אשר הלכת בהSelect 1 Kings 13:17
18ויאמר לו גם אני נביא כמוך ומלאך דבר אלי בדבר יהוה לאמר השבהו אתך אל ביתך ויאכל לחם וישת מים כחש לוSelect 1 Kings 13:18
19וישב אתו ויאכל לחם בביתו—וישת מיםSelect 1 Kings 13:19
20ויהי הם ישבים אל השלחן ויהי דבר יהוה אל הנביא אשר השיבוSelect 1 Kings 13:20
21ויקרא אל איש האלהים אשר בא מיהודה לאמר כה אמר יהוה יען כי מרית פי יהוה ולא שמרת את המצוה אשר צוך יהוה אלהיךSelect 1 Kings 13:21
22ותשב ותאכל לחם ותשת מים במקום אשר דבר אליך אל תאכל לחם ואל תשת מים—לא תבוא נבלתך אל קבר אבתיךSelect 1 Kings 13:22
23ויהי אחרי אכלו לחם—ואחרי שתותו ויחבש לו החמור לנביא אשר השיבוSelect 1 Kings 13:23
24וילך וימצאהו אריה בדרך וימיתהו ותהי נבלתו משלכת בדרך והחמור עמד אצלה והאריה עמד אצל הנבלהSelect 1 Kings 13:24
25והנה אנשים עברים ויראו את הנבלה משלכת בדרך ואת האריה עמד אצל הנבלה ויבאו וידברו בעיר אשר הנביא הזקן ישב בהSelect 1 Kings 13:25
26וישמע הנביא אשר השיבו מן הדרך ויאמר איש האלהים הוא אשר מרה את פי יהוה ויתנהו יהוה לאריה וישברהו וימתהו כדבר יהוה אשר דבר לוSelect 1 Kings 13:26
27וידבר אל בניו לאמר חבשו לי את החמור ויחבשוSelect 1 Kings 13:27
28וילך וימצא את נבלתו משלכת בדרך וחמור והאריה עמדים אצל הנבלה לא אכל האריה את הנבלה ולא שבר את החמורSelect 1 Kings 13:28
29וישא הנביא את נבלת איש האלהים וינחהו אל החמור—וישיבהו ויבא אל עיר הנביא הזקן לספד ולקברוSelect 1 Kings 13:29
30וינח את נבלתו בקברו ויספדו עליו הוי אחיSelect 1 Kings 13:30
31ויהי אחרי קברו אתו ויאמר אל בניו לאמר במותי וקברתם אתי בקבר אשר איש האלהים קבור בו אצל עצמתיו הניחו את עצמתיSelect 1 Kings 13:31
32כי היה יהיה הדבר אשר קרא בדבר יהוה על המזבח אשר בבית אל ועל כל בתי הבמות אשר בערי שמרוןSelect 1 Kings 13:32
33אחר הדבר הזה לא שב ירבעם מדרכו הרעה וישב ויעש מקצות העם כהני במות—החפץ ימלא את ידו ויהי כהני במותSelect 1 Kings 13:33
34ויהי בדבר הזה לחטאת בית ירבעם ולהכחיד ולהשמיד מעל פני האדמהSelect 1 Kings 13:34
Aleppo Codex (ALEPPO). Public domain. Text from the CrossWire Bible Society module. About this translation