15Deuteronomy 15

1מקץ שבע שנים תעשה שמטהSelect Deuteronomy 15:1

2וזה דבר השמטה—שמוט כל בעל משה ידו אשר ישה ברעהו לא יגש את רעהו ואת אחיו כי קרא שמטה ליהוהSelect Deuteronomy 15:2

3את הנכרי תגש ואשר יהיה לך את אחיך תשמט ידךSelect Deuteronomy 15:3

4אפס כי לא יהיה בך אביון כי ברך יברכך יהוה בארץ אשר יהוה אלהיך נתן לך נחלה לרשתהSelect Deuteronomy 15:4

5רק אם שמוע תשמע בקול יהוה אלהיך לשמר לעשות את כל המצוה הזאת אשר אנכי מצוך היוםSelect Deuteronomy 15:5

6כי יהוה אלהיך ברכך כאשר דבר לך והעבטת גוים רבים ואתה לא תעבט ומשלת בגוים רבים ובך לא ימשלוSelect Deuteronomy 15:6

7כי יהיה בך אביון מאחד אחיך באחד שעריך בארצך אשר יהוה אלהיך נתן לך—לא תאמץ את לבבך ולא תקפץ את ידך מאחיך האביוןSelect Deuteronomy 15:7

8כי פתח תפתח את ידך לו והעבט תעביטנו די מחסרו אשר יחסר לוSelect Deuteronomy 15:8

9השמר לך פן יהיה דבר עם לבבך בליעל לאמר קרבה שנת השבע שנת השמטה ורעה עינך באחיך האביון ולא תתן לו וקרא עליך אל יהוה והיה בך חטאSelect Deuteronomy 15:9

10נתון תתן לו ולא ירע לבבך בתתך לו כי בגלל הדבר הזה יברכך יהוה אלהיך בכל מעשך ובכל משלח ידךSelect Deuteronomy 15:10

11כי לא יחדל אביון מקרב הארץ על כן אנכי מצוך לאמר פתח תפתח את ידך לאחיך לעניך ולאבינך בארצךSelect Deuteronomy 15:11

12כי ימכר לך אחיך העברי או העבריה—ועבדך שש שנים ובשנה השביעת תשלחנו חפשי מעמךSelect Deuteronomy 15:12

13וכי תשלחנו חפשי מעמך—לא תשלחנו ריקםSelect Deuteronomy 15:13

14העניק תעניק לו מצאנך ומגרנך ומיקבך אשר ברכך יהוה אלהיך תתן לוSelect Deuteronomy 15:14

15וזכרת כי עבד היית בארץ מצרים ויפדך יהוה אלהיך על כן אנכי מצוך את הדבר הזה—היוםSelect Deuteronomy 15:15

16והיה כי יאמר אליך לא אצא מעמך כי אהבך ואת ביתך כי טוב לו עמךSelect Deuteronomy 15:16

17ולקחת את המרצע ונתתה באזנו ובדלת והיה לך עבד עולם ואף לאמתך תעשה כןSelect Deuteronomy 15:17

18לא יקשה בעינך בשלחך אתו חפשי מעמך—כי משנה שכר שכיר עבדך שש שנים וברכך יהוה אלהיך בכל אשר תעשהSelect Deuteronomy 15:18

19כל הבכור אשר יולד בבקרך ובצאנך הזכר—תקדיש ליהוה אלהיך לא תעבד בבכר שורך ולא תגז בכור צאנךSelect Deuteronomy 15:19

20לפני יהוה אלהיך תאכלנו שנה בשנה במקום אשר יבחר יהוה—אתה וביתךSelect Deuteronomy 15:20

21וכי יהיה בו מום פסח או עור כל מום רע—לא תזבחנו ליהוה אלהיךSelect Deuteronomy 15:21

22בשעריך תאכלנו—הטמא והטהור יחדו כצבי וכאילSelect Deuteronomy 15:22

23רק את דמו לא תאכל על הארץ תשפכנו כמיםSelect Deuteronomy 15:23