17Deuteronomy 17

1לא תזבח ליהוה אלהיך שור ושה אשר יהיה בו מום—כל דבר רע כי תועבת יהוה אלהיך הואSelect Deuteronomy 17:1

2כי ימצא בקרבך באחד שעריך אשר יהוה אלהיך נתן לך איש או אשה אשר יעשה את הרע בעיני יהוה אלהיך—לעבר בריתוSelect Deuteronomy 17:2

3וילך ויעבד אלהים אחרים וישתחו להם ולשמש או לירח או לכל צבא השמים—אשר לא צויתיSelect Deuteronomy 17:3

4והגד לך ושמעת ודרשת היטב—והנה אמת נכון הדבר נעשתה התועבה הזאת בישראלSelect Deuteronomy 17:4

5והוצאת את האיש ההוא או את האשה ההוא אשר עשו את הדבר הרע הזה אל שעריך—את האיש או את האשה וסקלתם באבנים ומתוSelect Deuteronomy 17:5

6על פי שנים עדים או שלשה עדים—יומת המת לא יומת על פי עד אחדSelect Deuteronomy 17:6

7יד העדים תהיה בו בראשנה להמיתו ויד כל העם באחרנה ובערת הרע מקרבךSelect Deuteronomy 17:7

8כי יפלא ממך דבר למשפט בין דם לדם בין דין לדין ובין נגע לנגע—דברי ריבת בשעריך וקמת ועלית—אל המקום אשר יבחר יהוה אלהיך בוSelect Deuteronomy 17:8

9ובאת אל הכהנים הלוים ואל השפט אשר יהיה בימים ההם ודרשת והגידו לך את דבר המשפטSelect Deuteronomy 17:9

10ועשית על פי הדבר אשר יגידו לך מן המקום ההוא אשר יבחר יהוה ושמרת לעשות ככל אשר יורוךSelect Deuteronomy 17:10

11על פי התורה אשר יורוך ועל המשפט אשר יאמרו לך—תעשה לא תסור מן הדבר אשר יגידו לך—ימין ושמאלSelect Deuteronomy 17:11

12והאיש אשר יעשה בזדון לבלתי שמע אל הכהן העמד לשרת שם את יהוה אלהיך או אל השפט—ומת האיש ההוא ובערת הרע מישראלSelect Deuteronomy 17:12

13וכל העם ישמעו ויראו ולא יזידון עודSelect Deuteronomy 17:13

14כי תבא אל הארץ אשר יהוה אלהיך נתן לך וירשתה וישבתה בה ואמרת אשימה עלי מלך ככל הגוים אשר סביבתיSelect Deuteronomy 17:14

15שום תשים עליך מלך אשר יבחר יהוה אלהיך בו מקרב אחיך תשים עליך מלך—לא תוכל לתת עליך איש נכרי אשר לא אחיך הואSelect Deuteronomy 17:15

16רק לא ירבה לו סוסים ולא ישיב את העם מצרימה למען הרבות סוס ויהוה אמר לכם לא תספון לשוב בדרך הזה עודSelect Deuteronomy 17:16

17ולא ירבה לו נשים ולא יסור לבבו וכסף וזהב לא ירבה לו מאדSelect Deuteronomy 17:17

18והיה כשבתו על כסא ממלכתו—וכתב לו את משנה התורה הזאת על ספר מלפני הכהנים הלויםSelect Deuteronomy 17:18

19והיתה עמו וקרא בו כל ימי חייו—למען ילמד ליראה את יהוה אלהיו לשמר את כל דברי התורה הזאת ואת החקים האלה לעשתםSelect Deuteronomy 17:19

20לבלתי רום לבבו מאחיו ולבלתי סור מן המצוה ימין ושמאול—למען יאריך ימים על ממלכתו הוא ובניו בקרב ישראלSelect Deuteronomy 17:20