12Exodus 12

1ויאמר יהוה אל משה ואל אהרן בארץ מצרים לאמרSelect Exodus 12:1

2החדש הזה לכם ראש חדשים ראשון הוא לכם לחדשי השנהSelect Exodus 12:2

3דברו אל כל עדת ישראל לאמר בעשר לחדש הזה ויקחו להם איש שה לבית אבת—שה לביתSelect Exodus 12:3

4ואם ימעט הבית מהיות משה—ולקח הוא ושכנו הקרב אל ביתו במכסת נפשת איש לפי אכלו תכסו על השהSelect Exodus 12:4

5שה תמים זכר בן שנה יהיה לכם מן הכבשים ומן העזים תקחוSelect Exodus 12:5

6והיה לכם למשמרת עד ארבעה עשר יום לחדש הזה ושחטו אתו כל קהל עדת ישראל—בין הערביםSelect Exodus 12:6

7ולקחו מן הדם ונתנו על שתי המזוזת ועל המשקוף—על הבתים אשר יאכלו אתו בהםSelect Exodus 12:7

8ואכלו את הבשר בלילה הזה צלי אש ומצות על מררים יאכלהוSelect Exodus 12:8

9אל תאכלו ממנו נא ובשל מבשל במים כי אם צלי אש ראשו על כרעיו ועל קרבוSelect Exodus 12:9

10ולא תותירו ממנו עד בקר והנתר ממנו עד בקר באש תשרפוSelect Exodus 12:10

11וככה תאכלו אתו—מתניכם חגרים נעליכם ברגליכם ומקלכם בידכם ואכלתם אתו בחפזון פסח הוא ליהוהSelect Exodus 12:11

12ועברתי בארץ מצרים בלילה הזה והכיתי כל בכור בארץ מצרים מאדם ועד בהמה ובכל אלהי מצרים אעשה שפטים אני יהוהSelect Exodus 12:12

13והיה הדם לכם לאת על הבתים אשר אתם שם וראיתי את הדם ופסחתי עלכם ולא יהיה בכם נגף למשחית בהכתי בארץ מצריםSelect Exodus 12:13

14והיה היום הזה לכם לזכרון וחגתם אתו חג ליהוה לדרתיכם חקת עולם תחגהוSelect Exodus 12:14

15שבעת ימים מצות תאכלו—אך ביום הראשון תשביתו שאר מבתיכם כי כל אכל חמץ ונכרתה הנפש ההוא מישראל—מיום הראשן עד יום השבעיSelect Exodus 12:15

16וביום הראשון מקרא קדש וביום השביעי מקרא קדש יהיה לכם כל מלאכה לא יעשה בהם—אך אשר יאכל לכל נפש הוא לבדו יעשה לכםSelect Exodus 12:16

17ושמרתם את המצות כי בעצם היום הזה הוצאתי את צבאותיכם מארץ מצרים ושמרתם את היום הזה לדרתיכם—חקת עולםSelect Exodus 12:17

18בראשן בארבעה עשר יום לחדש בערב תאכלו מצת עד יום האחד ועשרים לחדש—בערבSelect Exodus 12:18

19שבעת ימים—שאר לא ימצא בבתיכם כי כל אכל מחמצת ונכרתה הנפש ההוא מעדת ישראל—בגר ובאזרח הארץSelect Exodus 12:19

20כל מחמצת לא תאכלו בכל מושבתיכם תאכלו מצותSelect Exodus 12:20

21ויקרא משה לכל זקני ישראל ויאמר אלהם משכו וקחו לכם צאן למשפחתיכם—ושחטו הפסחSelect Exodus 12:21

22ולקחתם אגדת אזוב וטבלתם בדם אשר בסף והגעתם אל המשקוף ואל שתי המזוזת מן הדם אשר בסף ואתם לא תצאו איש מפתח ביתו—עד בקרSelect Exodus 12:22

23ועבר יהוה לנגף את מצרים וראה את הדם על המשקוף ועל שתי המזוזת ופסח יהוה על הפתח ולא יתן המשחית לבא אל בתיכם לנגףSelect Exodus 12:23

24ושמרתם את הדבר הזה לחק לך ולבניך עד עולםSelect Exodus 12:24

25והיה כי תבאו אל הארץ אשר יתן יהוה לכם—כאשר דבר ושמרתם את העבדה הזאתSelect Exodus 12:25

26והיה כי יאמרו אליכם בניכם מה העבדה הזאת לכםSelect Exodus 12:26

27ואמרתם זבח פסח הוא ליהוה אשר פסח על בתי בני ישראל במצרים בנגפו את מצרים ואת בתינו הציל ויקד העם וישתחווSelect Exodus 12:27

28וילכו ויעשו בני ישראל כאשר צוה יהוה את משה ואהרן כן עשוSelect Exodus 12:28

29ויהי בחצי הלילה ויהוה הכה כל בכור בארץ מצרים מבכר פרעה הישב על כסאו עד בכור השבי אשר בבית הבור וכל בכור בהמהSelect Exodus 12:29

30ויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשר אין שם מתSelect Exodus 12:30

31ויקרא למשה ולאהרן לילה ויאמר קומו צאו מתוך עמי—גם אתם גם בני ישראל ולכו עבדו את יהוה כדברכםSelect Exodus 12:31

32גם צאנכם גם בקרכם קחו כאשר דברתם ולכו וברכתם גם אתיSelect Exodus 12:32

33ותחזק מצרים על העם למהר לשלחם מן הארץ כי אמרו כלנו מתיםSelect Exodus 12:33

34וישא העם את בצקו טרם יחמץ משארתם צררת בשמלתם על שכמםSelect Exodus 12:34

35ובני ישראל עשו כדבר משה וישאלו ממצרים כלי כסף וכלי זהב ושמלתSelect Exodus 12:35

36ויהוה נתן את חן העם בעיני מצרים—וישאלום וינצלו את מצריםSelect Exodus 12:36

37ויסעו בני ישראל מרעמסס סכתה כשש מאות אלף רגלי הגברים לבד מטףSelect Exodus 12:37

38וגם ערב רב עלה אתם וצאן ובקר מקנה כבד מאדSelect Exodus 12:38

39ויאפו את הבצק אשר הוציאו ממצרים עגת מצות—כי לא חמץ כי גרשו ממצרים ולא יכלו להתמהמה וגם צדה לא עשו להםSelect Exodus 12:39

40ומושב בני ישראל אשר ישבו במצרים—שלשים שנה וארבע מאות שנהSelect Exodus 12:40

41ויהי מקץ שלשים שנה וארבע מאות שנה ויהי בעצם היום הזה יצאו כל צבאות יהוה מארץ מצריםSelect Exodus 12:41

42ליל שמרים הוא ליהוה להוציאם מארץ מצרים הוא הלילה הזה ליהוה שמרים לכל בני ישראל לדרתםSelect Exodus 12:42

43ויאמר יהוה אל משה ואהרן זאת חקת הפסח כל בן נכר לא יאכל בוSelect Exodus 12:43

44וכל עבד איש מקנת כסף—ומלתה אתו אז יאכל בוSelect Exodus 12:44

45תושב ושכיר לא יאכל בוSelect Exodus 12:45

46בבית אחד יאכל לא תוציא מן הבית מן הבשר חוצה ועצם לא תשברו בוSelect Exodus 12:46

47כל עדת ישראל יעשו אתוSelect Exodus 12:47

48וכי יגור אתך גר ועשה פסח ליהוה—המול לו כל זכר ואז יקרב לעשתו והיה כאזרח הארץ וכל ערל לא יאכל בוSelect Exodus 12:48

49תורה אחת יהיה לאזרח ולגר הגר בתוככםSelect Exodus 12:49

50ויעשו כל בני ישראל כאשר צוה יהוה את משה ואת אהרן כן עשוSelect Exodus 12:50

51ויהי בעצם היום הזה הוציא יהוה את בני ישראל מארץ מצרים—על צבאתםSelect Exodus 12:51