12Ezekiel 12

1ויהי דבר יהוה אלי לאמרSelect Ezekiel 12:1

2בן אדם בתוך בית המרי אתה ישב אשר עינים להם לראות ולא ראו אזנים להם לשמע ולא שמעו—כי בית מרי הםSelect Ezekiel 12:2

3ואתה בן אדם עשה לך כלי גולה וגלה יומם לעיניהם וגלית ממקומך אל מקום אחר לעיניהם—אולי יראו כי בית מרי המהSelect Ezekiel 12:3

4והוצאת כליך ככלי גולה יומם—לעיניהם ואתה תצא בערב לעיניהם כמוצאי גולהSelect Ezekiel 12:4

5לעיניהם חתר לך בקיר והוצאת בוSelect Ezekiel 12:5

6לעיניהם על כתף תשא בעלטה תוציא—פניך תכסה ולא תראה את הארץ כי מופת נתתיך לבית ישראלSelect Ezekiel 12:6

7ואעש כן כאשר צויתי כלי הוצאתי ככלי גולה יומם ובערב חתרתי לי בקיר ביד בעלטה הוצאתי על כתף נשאתי לעיניהםSelect Ezekiel 12:7

8ויהי דבר יהוה אלי בבקר לאמרSelect Ezekiel 12:8

9בן אדם הלא אמרו אליך בית ישראל בית המרי מה אתה עשהSelect Ezekiel 12:9

10אמר אליהם כה אמר אדני יהוה הנשיא המשא הזה בירושלם וכל בית ישראל אשר המה בתוכםSelect Ezekiel 12:10

11אמר אני מופתכם כאשר עשיתי כן יעשה להם—בגולה בשבי ילכוSelect Ezekiel 12:11

12והנשיא אשר בתוכם אל כתף ישא בעלטה ויצא—בקיר יחתרו להוציא בו פניו יכסה—יען אשר לא יראה לעין הוא את הארץSelect Ezekiel 12:12

13ופרשתי את רשתי עליו ונתפש במצודתי והבאתי אתו בבלה ארץ כשדים ואותה לא יראה ושם ימותSelect Ezekiel 12:13

14וכל אשר סביבתיו עזרה וכל אגפיו אזרה לכל רוח וחרב אריק אחריהםSelect Ezekiel 12:14

15וידעו כי אני יהוה בהפיצי אותם בגוים וזריתי אותם בארצותSelect Ezekiel 12:15

16והותרתי מהם אנשי מספר מחרב מרעב ומדבר—למען יספרו את כל תועבותיהם בגוים אשר באו שם וידעו כי אני יהוהSelect Ezekiel 12:16

17ויהי דבר יהוה אלי לאמרSelect Ezekiel 12:17

18בן אדם לחמך ברעש תאכל ומימיך ברגזה ובדאגה תשתהSelect Ezekiel 12:18

19ואמרת אל עם הארץ כה אמר אדני יהוה ליושבי ירושלם אל אדמת ישראל לחמם בדאגה יאכלו ומימיהם בשממון ישתו—למען תשם ארצה ממלאה מחמס כל הישבים בהSelect Ezekiel 12:19

20והערים הנושבות תחרבנה והארץ שממה תהיה וידעתם כי אני יהוהSelect Ezekiel 12:20

21ויהי דבר יהוה אלי לאמרSelect Ezekiel 12:21

22בן אדם מה המשל הזה לכם על אדמת ישראל לאמר יארכו הימים ואבד כל חזוןSelect Ezekiel 12:22

23לכן אמר אליהם כה אמר אדני יהוה השבתי את המשל הזה ולא ימשלו אתו עוד בישראל כי אם דבר אליהם קרבו הימים ודבר כל חזוןSelect Ezekiel 12:23

24כי לא יהיה עוד כל חזון שוא—ומקסם חלק בתוך בית ישראלSelect Ezekiel 12:24

25כי אני יהוה אדבר את אשר אדבר דבר ויעשה—לא תמשך עוד כי בימיכם בית המרי אדבר דבר ועשיתיו נאם אדני יהוהSelect Ezekiel 12:25

26ויהי דבר יהוה אלי לאמרSelect Ezekiel 12:26

27בן אדם הנה בית ישראל אמרים החזון אשר הוא חזה לימים רבים ולעתים רחוקות הוא נבאSelect Ezekiel 12:27

28לכן אמר אליהם כה אמר אדני יהוה לא תמשך עוד כל דברי—אשר אדבר דבר ויעשה נאם אדני יהוהSelect Ezekiel 12:28