26Genesis 26

1ויהי רעב בארץ מלבד הרעב הראשון אשר היה בימי אברהם וילך יצחק אל אבימלך מלך פלשתים גררהSelect Genesis 26:1

2וירא אליו יהוה ויאמר אל תרד מצרימה שכן בארץ אשר אמר אליךSelect Genesis 26:2

3גור בארץ הזאת ואהיה עמך ואברכך כי לך ולזרעך אתן את כל הארצת האל והקמתי את השבעה אשר נשבעתי לאברהם אביךSelect Genesis 26:3

4והרביתי את זרעך ככוכבי השמים ונתתי לזרעך את כל הארצת האל והתברכו בזרעך כל גויי הארץSelect Genesis 26:4

5עקב אשר שמע אברהם בקלי וישמר משמרתי מצותי חקותי ותורתיSelect Genesis 26:5

6וישב יצחק בגררSelect Genesis 26:6

7וישאלו אנשי המקום לאשתו ויאמר אחתי הוא כי ירא לאמר אשתי פן יהרגני אנשי המקום על רבקה כי טובת מראה הואSelect Genesis 26:7

8ויהי כי ארכו לו שם הימים וישקף אבימלך מלך פלשתים בעד החלון וירא והנה יצחק מצחק את רבקה אשתוSelect Genesis 26:8

9ויקרא אבימלך ליצחק ויאמר אך הנה אשתך הוא ואיך אמרת אחתי הוא ויאמר אליו יצחק כי אמרתי פן אמות עליהSelect Genesis 26:9

10ויאמר אבימלך מה זאת עשית לנו כמעט שכב אחד העם את אשתך והבאת עלינו אשםSelect Genesis 26:10

11ויצו אבימלך את כל העם לאמר הנגע באיש הזה ובאשתו—מות יומתSelect Genesis 26:11

12ויזרע יצחק בארץ ההוא וימצא בשנה ההוא מאה שערים ויברכהו יהוהSelect Genesis 26:12

13ויגדל האיש וילך הלוך וגדל עד כי גדל מאדSelect Genesis 26:13

14ויהי לו מקנה צאן ומקנה בקר ועבדה רבה ויקנאו אתו פלשתיםSelect Genesis 26:14

15וכל הבארת אשר חפרו עבדי אביו בימי אברהם אביו—סתמום פלשתים וימלאום עפרSelect Genesis 26:15

16ויאמר אבימלך אל יצחק לך מעמנו כי עצמת ממנו מאדSelect Genesis 26:16

17וילך משם יצחק ויחן בנחל גרר וישב שםSelect Genesis 26:17

18וישב יצחק ויחפר את בארת המים אשר חפרו בימי אברהם אביו ויסתמום פלשתים אחרי מות אברהם ויקרא להן שמות כשמת אשר קרא להן אביוSelect Genesis 26:18

19ויחפרו עבדי יצחק בנחל וימצאו שם—באר מים חייםSelect Genesis 26:19

20ויריבו רעי גרר עם רעי יצחק לאמר—לנו המים ויקרא שם הבאר עשק כי התעשקו עמוSelect Genesis 26:20

21ויחפרו באר אחרת ויריבו גם עליה ויקרא שמה שטנהSelect Genesis 26:21

22ויעתק משם ויחפר באר אחרת ולא רבו עליה ויקרא שמה רחבות ויאמר כי עתה הרחיב יהוה לנו ופרינו בארץSelect Genesis 26:22

23ויעל משם באר שבעSelect Genesis 26:23

24וירא אליו יהוה בלילה ההוא ויאמר אנכי אלהי אברהם אביך אל תירא כי אתך אנכי וברכתיך והרביתי את זרעך בעבור אברהם עבדיSelect Genesis 26:24

25ויבן שם מזבח ויקרא בשם יהוה ויט שם אהלו ויכרו שם עבדי יצחק בארSelect Genesis 26:25

26ואבימלך הלך אליו מגרר ואחזת מרעהו ופיכל שר צבאוSelect Genesis 26:26

27ויאמר אלהם יצחק מדוע באתם אלי ואתם שנאתם אתי ותשלחוני מאתכםSelect Genesis 26:27

28ויאמרו ראו ראינו כי היה יהוה עמך ונאמר תהי נא אלה בינותינו בינינו ובינך ונכרתה ברית עמךSelect Genesis 26:28

29אם תעשה עמנו רעה כאשר לא נגענוך וכאשר עשינו עמך רק טוב ונשלחך בשלום אתה עתה ברוך יהוהSelect Genesis 26:29

30ויעש להם משתה ויאכלו וישתוSelect Genesis 26:30

31וישכימו בבקר וישבעו איש לאחיו וישלחם יצחק וילכו מאתו בשלוםSelect Genesis 26:31

32ויהי ביום ההוא ויבאו עבדי יצחק ויגדו לו על אדות הבאר אשר חפרו ויאמרו לו מצאנו מיםSelect Genesis 26:32

33ויקרא אתה שבעה על כן שם העיר באר שבע עד היום הזהSelect Genesis 26:33

34ויהי עשו בן ארבעים שנה ויקח אשה את יהודית בת בארי החתי—ואת בשמת בת אילן החתיSelect Genesis 26:34

35ותהיין מרת רוח ליצחק ולרבקהSelect Genesis 26:35