39Genesis 39

1ויוסף הורד מצרימה ויקנהו פוטיפר סריס פרעה שר הטבחים איש מצרי מיד הישמעאלים אשר הורדהו שמהSelect Genesis 39:1

2ויהי יהוה את יוסף ויהי איש מצליח ויהי בבית אדניו המצריSelect Genesis 39:2

3וירא אדניו כי יהוה אתו וכל אשר הוא עשה יהוה מצליח בידוSelect Genesis 39:3

4וימצא יוסף חן בעיניו וישרת אתו ויפקדהו על ביתו וכל יש לו נתן בידוSelect Genesis 39:4

5ויהי מאז הפקיד אתו בביתו ועל כל אשר יש לו ויברך יהוה את בית המצרי בגלל יוסף ויהי ברכת יהוה בכל אשר יש לו—בבית ובשדהSelect Genesis 39:5

6ויעזב כל אשר לו ביד יוסף ולא ידע אתו מאומה כי אם הלחם אשר הוא אוכל ויהי יוסף יפה תאר ויפה מראהSelect Genesis 39:6

7ויהי אחר הדברים האלה ותשא אשת אדניו את עיניה אל יוסף ותאמר שכבה עמיSelect Genesis 39:7

8וימאן—ויאמר אל אשת אדניו הן אדני לא ידע אתי מה בבית וכל אשר יש לו נתן בידיSelect Genesis 39:8

9איננו גדול בבית הזה ממני ולא חשך ממני מאומה כי אם אותך באשר את אשתו ואיך אעשה הרעה הגדלה הזאת וחטאתי לאלהיםSelect Genesis 39:9

10ויהי כדברה אל יוסף יום יום ולא שמע אליה לשכב אצלה להיות עמהSelect Genesis 39:10

11ויהי כהיום הזה ויבא הביתה לעשות מלאכתו ואין איש מאנשי הבית שם—בביתSelect Genesis 39:11

12ותתפשהו בבגדו לאמר שכבה עמי ויעזב בגדו בידה וינס ויצא החוצהSelect Genesis 39:12

13ויהי כראותה כי עזב בגדו בידה וינס החוצהSelect Genesis 39:13

14ותקרא לאנשי ביתה ותאמר להם לאמר ראו הביא לנו איש עברי לצחק בנו בא אלי לשכב עמי ואקרא בקול גדולSelect Genesis 39:14

15ויהי כשמעו כי הרימתי קולי ואקרא ויעזב בגדו אצלי וינס ויצא החוצהSelect Genesis 39:15

16ותנח בגדו אצלה עד בוא אדניו אל ביתוSelect Genesis 39:16

17ותדבר אליו כדברים האלה לאמר בא אלי העבד העברי אשר הבאת לנו—לצחק ביSelect Genesis 39:17

18ויהי כהרימי קולי ואקרא ויעזב בגדו אצלי וינס החוצהSelect Genesis 39:18

19ויהי כשמע אדניו את דברי אשתו אשר דברה אליו לאמר כדברים האלה עשה לי עבדך ויחר אפוSelect Genesis 39:19

20ויקח אדני יוסף אתו ויתנהו אל בית הסהר—מקום אשר אסורי (אסירי) המלך אסורים ויהי שם בבית הסהרSelect Genesis 39:20

21ויהי יהוה את יוסף ויט אליו חסד ויתן חנו בעיני שר בית הסהרSelect Genesis 39:21

22ויתן שר בית הסהר ביד יוסף את כל האסירם אשר בבית הסהר ואת כל אשר עשים שם הוא היה עשהSelect Genesis 39:22

23אין שר בית הסהר ראה את כל מאומה בידו באשר יהוה אתו ואשר הוא עשה יהוה מצליחSelect Genesis 39:23