44Jeremiah 44

1הדבר אשר היה אל ירמיהו אל כל היהודים הישבים בארץ מצרים—הישבים במגדל ובתחפנחס ובנף ובארץ פתרוס לאמרSelect Jeremiah 44:1

2כה אמר יהוה צבאות אלהי ישראל אתם ראיתם את כל הרעה אשר הבאתי על ירושלם ועל כל ערי יהודה והנם חרבה היום הזה ואין בהם יושבSelect Jeremiah 44:2

3מפני רעתם אשר עשו להכעסני ללכת לקטר לעבד לאלהים אחרים—אשר לא ידעום המה אתם ואבתיכםSelect Jeremiah 44:3

4ואשלח אליכם את כל עבדי הנביאים השכים ושלח לאמר אל נא תעשו את דבר התעבה הזאת—אשר שנאתיSelect Jeremiah 44:4

5ולא שמעו ולא הטו את אזנם לשוב מרעתם—לבלתי קטר לאלהים אחריםSelect Jeremiah 44:5

6ותתך חמתי ואפי ותבער בערי יהודה ובחצות ירושלם ותהיינה לחרבה לשממה כיום הזהSelect Jeremiah 44:6

7ועתה כה אמר יהוה אלהי צבאות אלהי ישראל למה אתם עשים רעה גדולה אל נפשתכם להכרית לכם איש ואשה עולל ויונק מתוך יהודה—לבלתי הותיר לכם שאריתSelect Jeremiah 44:7

8להכעסני במעשי ידיכם לקטר לאלהים אחרים בארץ מצרים אשר אתם באים לגור שם—למען הכרית לכם ולמען היותכם לקללה ולחרפה בכל גוי הארץSelect Jeremiah 44:8

9השכחתם את רעות אבותיכם ואת רעות מלכי יהודה ואת רעות נשיו ואת רעתכם ואת רעת נשיכם—אשר עשו בארץ יהודה ובחצות ירושלםSelect Jeremiah 44:9

10לא דכאו עד היום הזה ולא יראו ולא הלכו בתורתי ובחקתי אשר נתתי לפניכם ולפני אבותיכםSelect Jeremiah 44:10

11לכן כה אמר יהוה צבאות אלהי ישראל הנני שם פני בכם לרעה—ולהכרית את כל יהודהSelect Jeremiah 44:11

12ולקחתי את שארית יהודה אשר שמו פניהם לבוא ארץ מצרים לגור שם ותמו כל בארץ מצרים יפלו בחרב ברעב יתמו מקטן ועד גדול בחרב וברעב ימתו והיו לאלה לשמה ולקללה ולחרפהSelect Jeremiah 44:12

13ופקדתי על היושבים בארץ מצרים כאשר פקדתי על ירושלם—בחרב ברעב ובדברSelect Jeremiah 44:13

14ולא יהיה פליט ושריד לשארית יהודה הבאים לגור שם בארץ מצרים ולשוב ארץ יהודה אשר המה מנשאים את נפשם לשוב לשבת שם—כי לא ישובו כי אם פלטיםSelect Jeremiah 44:14

15ויענו את ירמיהו כל האנשים הידעים כי מקטרות נשיהם לאלהים אחרים וכל הנשים העמדות קהל גדול וכל העם הישבים בארץ מצרים בפתרוס לאמרSelect Jeremiah 44:15

16הדבר אשר דברת אלינו בשם יהוה—איננו שמעים אליךSelect Jeremiah 44:16

17כי עשה נעשה את כל הדבר אשר יצא מפינו לקטר למלכת השמים והסיך לה נסכים כאשר עשינו אנחנו ואבתינו מלכינו ושרינו בערי יהודה ובחצות ירושלם ונשבע לחם ונהיה טובים ורעה לא ראינוSelect Jeremiah 44:17

18ומן אז חדלנו לקטר למלכת השמים והסך לה נסכים—חסרנו כל ובחרב וברעב תמנוSelect Jeremiah 44:18

19וכי אנחנו מקטרים למלכת השמים ולהסך לה נסכים המבלעדי אנשינו עשינו לה כונים להעצבה והסך לה נסכיםSelect Jeremiah 44:19

20ויאמר ירמיהו אל כל העם על הגברים ועל הנשים ועל כל העם הענים אתו דבר לאמרSelect Jeremiah 44:20

21הלוא את הקטר אשר קטרתם בערי יהודה ובחצות ירושלם אתם ואבותיכם מלכיכם ושריכם ועם הארץ אתם זכר יהוה ותעלה על לבוSelect Jeremiah 44:21

22ולא יוכל יהוה עוד לשאת מפני רע מעלליכם מפני התועבת אשר עשיתם ותהי ארצכם לחרבה ולשמה ולקללה מאין יושב—כהיום הזהSelect Jeremiah 44:22

23מפני אשר קטרתם ואשר חטאתם ליהוה ולא שמעתם בקול יהוה ובתרתו ובחקתיו ובעדותיו לא הלכתם על כן קראת אתכם הרעה הזאת—כיום הזהSelect Jeremiah 44:23

24ויאמר ירמיהו אל כל העם ואל כל הנשים שמעו דבר יהוה כל יהודה אשר בארץ מצריםSelect Jeremiah 44:24

25כה אמר יהוה צבאות אלהי ישראל לאמר אתם ונשיכם ותדברנה בפיכם ובידיכם מלאתם לאמר עשה נעשה את נדרינו אשר נדרנו לקטר למלכת השמים ולהסך לה נסכים הקים תקימנה את נדריכם ועשה תעשינה את נדריכםSelect Jeremiah 44:25

26לכן שמעו דבר יהוה כל יהודה הישבים בארץ מצרים הנני נשבעתי בשמי הגדול אמר יהוה אם יהיה עוד שמי נקרא בפי כל איש יהודה אמר חי אדני יהוה בכל ארץ מצריםSelect Jeremiah 44:26

27הנני שקד עליהם לרעה ולא לטובה ותמו כל איש יהודה אשר בארץ מצרים בחרב וברעב—עד כלותםSelect Jeremiah 44:27

28ופליטי חרב ישבון מן ארץ מצרים ארץ יהודה—מתי מספר וידעו כל שארית יהודה הבאים לארץ מצרים לגור שם דבר מי יקום ממני ומהםSelect Jeremiah 44:28

29וזאת לכם האות נאם יהוה כי פקד אני עליכם במקום הזה—למען תדעו כי קום יקומו דברי עליכם לרעהSelect Jeremiah 44:29

30כה אמר יהוה הנני נתן את פרעה חפרע מלך מצרים ביד איביו וביד מבקשי נפשו כאשר נתתי את צדקיהו מלך יהודה ביד נבוכדראצר מלך בבל איבו—ומבקש נפשוSelect Jeremiah 44:30