7Joshua 7

1וימעלו בני ישראל מעל בחרם ויקח עכן בן כרמי בן זבדי בן זרח למטה יהודה מן החרם ויחר אף יהוה בבני ישראלSelect Joshua 7:1

2וישלח יהושע אנשים מיריחו העי אשר עם בית און מקדם לבית אל ויאמר אליהם לאמר עלו ורגלו את הארץ ויעלו האנשים וירגלו את העיSelect Joshua 7:2

3וישבו אל יהושע ויאמרו אליו אל יעל כל העם—כאלפים איש או כשלשת אלפים איש יעלו ויכו את העי אל תיגע שמה את כל העם כי מעט המהSelect Joshua 7:3

4ויעלו מן העם שמה כשלשת אלפים איש וינסו לפני אנשי העיSelect Joshua 7:4

5ויכו מהם אנשי העי כשלשים וששה איש וירדפום לפני השער עד השברים ויכום במורד וימס לבב העם ויהי למיםSelect Joshua 7:5

6ויקרע יהושע שמלתיו ויפל על פניו ארצה לפני ארון יהוה עד הערב—הוא וזקני ישראל ויעלו עפר על ראשםSelect Joshua 7:6

7ויאמר יהושע אהה אדני יהוה למה העברת העביר את העם הזה את הירדן לתת אתנו ביד האמרי להאבידנו ולו הואלנו ונשב בעבר הירדןSelect Joshua 7:7

8בי אדני מה אמר—אחרי אשר הפך ישראל ערף לפני איביוSelect Joshua 7:8

9וישמעו הכנעני וכל ישבי הארץ ונסבו עלינו והכריתו את שמנו מן הארץ ומה תעשה לשמך הגדולSelect Joshua 7:9

10ויאמר יהוה אל יהושע קם לך למה זה אתה נפל על פניךSelect Joshua 7:10

11חטא ישראל וגם עברו את בריתי אשר צויתי אותם וגם לקחו מן החרם וגם גנבו וגם כחשו וגם שמו בכליהםSelect Joshua 7:11

12ולא יכלו בני ישראל לקום לפני איביהם—ערף יפנו לפני איביהם כי היו לחרם לא אוסיף להיות עמכם אם לא תשמידו החרם מקרבכםSelect Joshua 7:12

13קם קדש את העם ואמרת התקדשו למחר כי כה אמר יהוה אלהי ישראל חרם בקרבך ישראל—לא תוכל לקום לפני איביך עד הסירכם החרם מקרבכםSelect Joshua 7:13

14ונקרבתם בבקר לשבטיכם והיה השבט אשר ילכדנו יהוה יקרב למשפחות והמשפחה אשר ילכדנה יהוה תקרב לבתים והבית אשר ילכדנו יהוה יקרב לגבריםSelect Joshua 7:14

15והיה הנלכד בחרם—ישרף באש אתו ואת כל אשר לו כי עבר את ברית יהוה וכי עשה נבלה בישראלSelect Joshua 7:15

16וישכם יהושע בבקר ויקרב את ישראל לשבטיו וילכד שבט יהודהSelect Joshua 7:16

17ויקרב את משפחת יהודה וילכד את משפחת הזרחי ויקרב את משפחת הזרחי לגברים וילכד זבדיSelect Joshua 7:17

18ויקרב את ביתו לגברים וילכד עכן בן כרמי בן זבדי בן זרח—למטה יהודהSelect Joshua 7:18

19ויאמר יהושע אל עכן בני שים נא כבוד ליהוה אלהי ישראל—ותן לו תודה והגד נא לי מה עשית אל תכחד ממניSelect Joshua 7:19

20ויען עכן את יהושע ויאמר אמנה אנכי חטאתי ליהוה אלהי ישראל וכזאת וכזאת עשיתיSelect Joshua 7:20

21ואראה (וארא) בשלל אדרת שנער אחת טובה ומאתים שקלים כסף ולשון זהב אחד חמשים שקלים משקלו ואחמדם ואקחם והנם טמונים בארץ בתוך האהלי והכסף תחתיהSelect Joshua 7:21

22וישלח יהושע מלאכים וירצו האהלה והנה טמונה באהלו והכסף תחתיהSelect Joshua 7:22

23ויקחום מתוך האהל ויבאום אל יהושע ואל כל בני ישראל ויצקם לפני יהוהSelect Joshua 7:23

24ויקח יהושע את עכן בן זרח ואת הכסף ואת האדרת ואת לשון הזהב ואת בניו ואת בנתיו ואת שורו ואת חמרו ואת צאנו ואת אהלו ואת כל אשר לו וכל ישראל עמו ויעלו אתם עמק עכורSelect Joshua 7:24

25ויאמר יהושע מה עכרתנו יעכרך יהוה ביום הזה וירגמו אתו כל ישראל אבן וישרפו אתם באש ויסקלו אתם באבניםSelect Joshua 7:25

26ויקימו עליו גל אבנים גדול עד היום הזה וישב יהוה מחרון אפו על כן קרא שם המקום ההוא עמק עכור עד היום הזהSelect Joshua 7:26