7Leviticus 7

1וזאת תורת האשם קדש קדשים הואSelect Leviticus 7:1

2במקום אשר ישחטו את העלה ישחטו את האשם ואת דמו יזרק על המזבח סביבSelect Leviticus 7:2

3ואת כל חלבו יקריב ממנו—את האליה ואת החלב המכסה את הקרבSelect Leviticus 7:3

4ואת שתי הכלית ואת החלב אשר עליהן אשר על הכסלים ואת היתרת על הכבד על הכלית יסירנהSelect Leviticus 7:4

5והקטיר אתם הכהן המזבחה אשה ליהוה אשם הואSelect Leviticus 7:5

6כל זכר בכהנים יאכלנו במקום קדוש יאכל קדש קדשים הואSelect Leviticus 7:6

7כחטאת כאשם—תורה אחת להם הכהן אשר יכפר בו לו יהיהSelect Leviticus 7:7

8והכהן—המקריב את עלת איש עור העלה אשר הקריב לכהן לו יהיהSelect Leviticus 7:8

9וכל מנחה אשר תאפה בתנור וכל נעשה במרחשת ועל מחבת—לכהן המקריב אתה לו תהיהSelect Leviticus 7:9

10וכל מנחה בלולה בשמן וחרבה—לכל בני אהרן תהיה איש כאחיוSelect Leviticus 7:10

11וזאת תורת זבח השלמים אשר יקריב ליהוהSelect Leviticus 7:11

12אם על תודה יקריבנו—והקריב על זבח התודה חלות מצות בלולת בשמן ורקיקי מצות משחים בשמן וסלת מרבכת חלת בלולת בשמןSelect Leviticus 7:12

13על חלת לחם חמץ יקריב קרבנו על זבח תודת שלמיוSelect Leviticus 7:13

14והקריב ממנו אחד מכל קרבן תרומה ליהוה לכהן הזרק את דם השלמים—לו יהיהSelect Leviticus 7:14

15ובשר זבח תודת שלמיו—ביום קרבנו יאכל לא יניח ממנו עד בקרSelect Leviticus 7:15

16ואם נדר או נדבה זבח קרבנו—ביום הקריבו את זבחו יאכל וממחרת והנותר ממנו יאכלSelect Leviticus 7:16

17והנותר מבשר הזבח—ביום השלישי באש ישרףSelect Leviticus 7:17

18ואם האכל יאכל מבשר זבח שלמיו ביום השלישי לא ירצה—המקריב אתו לא יחשב לו פגול יהיה והנפש האכלת ממנו עונה תשאSelect Leviticus 7:18

19והבשר אשר יגע בכל טמא לא יאכל—באש ישרף והבשר—כל טהור יאכל בשרSelect Leviticus 7:19

20והנפש אשר תאכל בשר מזבח השלמים אשר ליהוה וטמאתו עליו—ונכרתה הנפש ההוא מעמיהSelect Leviticus 7:20

21ונפש כי תגע בכל טמא בטמאת אדם או בבהמה טמאה או בכל שקץ טמא ואכל מבשר זבח השלמים אשר ליהוה—ונכרתה הנפש ההוא מעמיהSelect Leviticus 7:21

22וידבר יהוה אל משה לאמרSelect Leviticus 7:22

23דבר אל בני ישראל לאמר כל חלב שור וכשב ועז—לא תאכלוSelect Leviticus 7:23

24וחלב נבלה וחלב טרפה יעשה לכל מלאכה ואכל לא תאכלהוSelect Leviticus 7:24

25כי כל אכל חלב מן הבהמה אשר יקריב ממנה אשה ליהוה—ונכרתה הנפש האכלת מעמיהSelect Leviticus 7:25

26וכל דם לא תאכלו בכל מושבתיכם לעוף ולבהמהSelect Leviticus 7:26

27כל נפש אשר תאכל כל דם—ונכרתה הנפש ההוא מעמיהSelect Leviticus 7:27

28וידבר יהוה אל משה לאמרSelect Leviticus 7:28

29דבר אל בני ישראל לאמר המקריב את זבח שלמיו ליהוה—יביא את קרבנו ליהוה מזבח שלמיוSelect Leviticus 7:29

30ידיו תביאינה את אשי יהוה את החלב על החזה יביאנו—את החזה להניף אתו תנופה לפני יהוהSelect Leviticus 7:30

31והקטיר הכהן את החלב המזבחה והיה החזה לאהרן ולבניוSelect Leviticus 7:31

32ואת שוק הימין תתנו תרומה לכהן מזבחי שלמיכםSelect Leviticus 7:32

33המקריב את דם השלמים ואת החלב—מבני אהרן לו תהיה שוק הימין למנהSelect Leviticus 7:33

34כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראלSelect Leviticus 7:34

35זאת משחת אהרן ומשחת בניו מאשי יהוה ביום הקריב אתם לכהן ליהוהSelect Leviticus 7:35

36אשר צוה יהוה לתת להם ביום משחו אתם מאת בני ישראל—חקת עולם לדרתםSelect Leviticus 7:36

37זאת התורה לעלה למנחה ולחטאת ולאשם ולמלואים—ולזבח השלמיםSelect Leviticus 7:37

38אשר צוה יהוה את משה בהר סיני ביום צותו את בני ישראל להקריב את קרבניהם ליהוה—במדבר סיניSelect Leviticus 7:38