8Leviticus 8

1וידבר יהוה אל משה לאמרSelect Leviticus 8:1

2קח את אהרן ואת בניו אתו ואת הבגדים ואת שמן המשחה ואת פר החטאת ואת שני האילים ואת סל המצותSelect Leviticus 8:2

3ואת כל העדה הקהל אל פתח אהל מועדSelect Leviticus 8:3

4ויעש משה כאשר צוה יהוה אתו ותקהל העדה אל פתח אהל מועדSelect Leviticus 8:4

5ויאמר משה אל העדה זה הדבר אשר צוה יהוה לעשותSelect Leviticus 8:5

6ויקרב משה את אהרן ואת בניו וירחץ אתם במיםSelect Leviticus 8:6

7ויתן עליו את הכתנת ויחגר אתו באבנט וילבש אתו את המעיל ויתן עליו את האפד ויחגר אתו בחשב האפד ויאפד לו בוSelect Leviticus 8:7

8וישם עליו את החשן ויתן אל החשן את האורים ואת התמיםSelect Leviticus 8:8

9וישם את המצנפת על ראשו וישם על המצנפת אל מול פניו את ציץ הזהב נזר הקדש כאשר צוה יהוה את משהSelect Leviticus 8:9

10ויקח משה את שמן המשחה וימשח את המשכן ואת כל אשר בו ויקדש אתםSelect Leviticus 8:10

11ויז ממנו על המזבח שבע פעמים וימשח את המזבח ואת כל כליו ואת הכיר ואת כנו—לקדשםSelect Leviticus 8:11

12ויצק משמן המשחה על ראש אהרן וימשח אתו לקדשוSelect Leviticus 8:12

13ויקרב משה את בני אהרן וילבשם כתנת ויחגר אתם אבנט ויחבש להם מגבעות—כאשר צוה יהוה את משהSelect Leviticus 8:13

14ויגש את פר החטאת ויסמך אהרן ובניו את ידיהם על ראש פר החטאתSelect Leviticus 8:14

15וישחט ויקח משה את הדם ויתן על קרנות המזבח סביב באצבעו ויחטא את המזבח ואת הדם יצק אל יסוד המזבח ויקדשהו לכפר עליוSelect Leviticus 8:15

16ויקח את כל החלב אשר על הקרב ואת יתרת הכבד ואת שתי הכלית ואת חלבהן ויקטר משה המזבחהSelect Leviticus 8:16

17ואת הפר ואת ערו ואת בשרו ואת פרשו—שרף באש מחוץ למחנה כאשר צוה יהוה את משהSelect Leviticus 8:17

18ויקרב את איל העלה ויסמכו אהרן ובניו את ידיהם—על ראש האילSelect Leviticus 8:18

19וישחט ויזרק משה את הדם על המזבח סביבSelect Leviticus 8:19

20ואת האיל—נתח לנתחיו ויקטר משה את הראש ואת הנתחים ואת הפדרSelect Leviticus 8:20

21ואת הקרב ואת הכרעים רחץ במים ויקטר משה את כל האיל המזבחה עלה הוא לריח ניחח אשה הוא ליהוה כאשר צוה יהוה את משהSelect Leviticus 8:21

22ויקרב את האיל השני איל המלאים ויסמכו אהרן ובניו את ידיהם—על ראש האילSelect Leviticus 8:22

23וישחט—ויקח משה מדמו ויתן על תנוך אזן אהרן הימנית ועל בהן ידו הימנית ועל בהן רגלו הימניתSelect Leviticus 8:23

24ויקרב את בני אהרן ויתן משה מן הדם על תנוך אזנם הימנית ועל בהן ידם הימנית ועל בהן רגלם הימנית ויזרק משה את הדם על המזבח סביבSelect Leviticus 8:24

25ויקח את החלב ואת האליה ואת כל החלב אשר על הקרב ואת יתרת הכבד ואת שתי הכלית ואת חלבהן ואת שוק הימיןSelect Leviticus 8:25

26ומסל המצות אשר לפני יהוה לקח חלת מצה אחת וחלת לחם שמן אחת—ורקיק אחד וישם על החלבים ועל שוק הימיןSelect Leviticus 8:26

27ויתן את הכל—על כפי אהרן ועל כפי בניו וינף אתם תנופה לפני יהוהSelect Leviticus 8:27

28ויקח משה אתם מעל כפיהם ויקטר המזבחה על העלה מלאים הם לריח ניחח אשה הוא ליהוהSelect Leviticus 8:28

29ויקח משה את החזה ויניפהו תנופה לפני יהוה מאיל המלאים למשה היה למנה כאשר צוה יהוה את משהSelect Leviticus 8:29

30ויקח משה משמן המשחה ומן הדם אשר על המזבח ויז על אהרן על בגדיו ועל בניו ועל בגדי בניו אתו ויקדש את אהרן את בגדיו ואת בניו ואת בגדי בניו אתוSelect Leviticus 8:30

31ויאמר משה אל אהרן ואל בניו בשלו את הבשר פתח אהל מועד ושם תאכלו אתו ואת הלחם אשר בסל המלאים כאשר צויתי לאמר אהרן ובניו יאכלהוSelect Leviticus 8:31

32והנותר בבשר ובלחם—באש תשרפוSelect Leviticus 8:32

33ומפתח אהל מועד לא תצאו שבעת ימים—עד יום מלאת ימי מלאיכם כי שבעת ימים ימלא את ידכםSelect Leviticus 8:33

34כאשר עשה ביום הזה—צוה יהוה לעשת לכפר עליכםSelect Leviticus 8:34

35ופתח אהל מועד תשבו יומם ולילה שבעת ימים ושמרתם את משמרת יהוה ולא תמותו כי כן צויתיSelect Leviticus 8:35

36ויעש אהרן ובניו—את כל הדברים אשר צוה יהוה ביד משהSelect Leviticus 8:36