11Luke 11

1Y anacó, que sinando beqelando andré yeque stano, pur achinóse a mui, penó á ó yeque es discipules de ó. Erañó, bedela amangue a manguelar á Un-debél, sasta tambien Juan bedó á desqueres discipules.Select Luke 11:1

2Y les penó: Pur manguelareis, penelad: Amaro Dada, oté andré o Tarpe, majarificable sinele tun nao. Abillele tun chim. Sinele querdi tun pesquital andré a jolili, sasta andré o Tarpe.Select Luke 11:2

3Diñamangue achibes amaro manro de cada chibes.Select Luke 11:3

4Y amangue ertina amarias visabas, andiar sasta mu ertinamos á os sares, sos debisarelen amangue buchi. Y na enseeles amangue andré o chungalo y choro.Select Luke 11:4

5Les penó tambien: Coin de sangue terela yeque monro, y chalará á ó á pas-rachi, y le penará: Monro, prestelamangue trin manres,Select Luke 11:5

6Presas monro de mangue ha bigoreado del drun, y na terelo buchi que chitar anglal de ó.Select Luke 11:6

7Y o aver rudelase de enrun, penando: Na sinele á mangue trajatoso, ya sinela pandada a bundal, y minres lacrés sinelan tambien sasta menda andré a cheripen, n’astis que menda me costunase somia diñartelos.Select Luke 11:7

8Y si o aver perseverase araquerando á la bundal, penelo á sangue, que ya que na se costunase á diñarselos por sinelar desquero quiribo; aromali por desqueres goles se costunaria, y le diñaria sares os manres hubiese menester.Select Luke 11:8

9Y menda penelo á sangue: Manguelad, y se os diñará: orotelad, y alachalareis: araquelad, y se os pendrabará.Select Luke 11:9

10Presas o saro sos manguela, ustilela: y ó sos orotela, alachela: y al sos araquela, se le despandará.Select Luke 11:10

11¿Y si yeque de sangue manguelare manro á desquero batu, le diñara ó yeque bar? ¿ó si yeque macho, por baji le diñará yeque julistraba en lugar e macho?Select Luke 11:11

12¿O si le manguelare yeque anro, por baji le bucharará yeque escorpion?Select Luke 11:12

13Pues si sangue, sinando chorés, chanelais diñar lachias diñipenes á jires chabores ¿cuanto butér jire Dada del Tarpe diñara suncai lachi á junos sos se lo manguelaren?Select Luke 11:13

14Y sinaba Jesus bucharando abri yeque bengue: y ocona sinaba musilé, y pur hubó bucharado al bengue, chamulió o musilé, y sares se zibáron.Select Luke 11:14

15Tami yeques de junos penáron: André sila de Beelzebub Manclay es bengues, bucharela os bengues.Select Luke 11:15

16Y averes somia pesquibarle, le manguelaban simache del Tarpe.Select Luke 11:16

17Y pur dicó os carlochines de junos, les penó: Saro chim chingarando contra sí matejo, sinará chibado andré najipen; y perará quer opré quer.Select Luke 11:17

18Pues si Satanas sinele tambien en billa contra sí matejo, ¿como sinará en pindré o chim de ó? presas penelais que menda bucharelo abrí bengues por sila de Beelzebub.Select Luke 11:18

19Pues si menda por sila de Beelzebub bucharelo os bengues, ¿jirés chabores por coin os bucharelan? Por ocono sinarán junos jueces de sangue.Select Luke 11:19

20Tami si sat l’angusti de Debél bucharelo os bengues, aromalí o chim de Debél ha bigoreado á sangue.Select Luke 11:20

21Pur o manusalo ujarela desquero quer, andré trifusco sinelan sarias as buchias que terela.Select Luke 11:21

22Tami si abillando aver butér manusalo que ó, le venciere, le nicobará sarias as armas de ó, andré que pachibelaba, y sicobará desquero jayere.Select Luke 11:22

23O sos na sinela con-a-mangue, contra mangue sinela: O sos na ustilela con-a-mangue, najibela.Select Luke 11:23

24Pur o bengue jindo ha chalado abrí de yeque manu, pirela por stanes bipaniosos orotando paratuté: y pur no lo alachela, penela: Mangue limbidiare á minrio quer, d’uque chalé abrí.Select Luke 11:24

25Y pur limbidiela, lo alachela julabado y chito.Select Luke 11:25

26Entonces chala, y ustilela sat ó averes efta bengues, butér chores que ó, y chalan andré, y socabelan oté. Y lo segriton de ocola manu sinela butér choro que lo brotobo.Select Luke 11:26

27Y anacó, que penando ó ocono, yeque cadchi de enré a sueti ardiñó a voz, y le garló: Majari a poria sos te chindó, y as chuchais sos mamaste.Select Luke 11:27

28Y ó rudeló: Nanai! antes majares junos sos junelan a varda de Debél y l’ujarelan.Select Luke 11:28

29Y sasta a sueti abillase de sarias aricatas, se chibó a penar: Ocona rati, rati sungali sinela, simache manguela, y simache na le sinará diñada, sino a simache e Propheta Jonás.Select Luke 11:29

30Presas sasta Jonás sinaba simache a junos de Ninive; andiar tambien o Chaboro e manu la sinará á ocona rati.Select Luke 11:30

31La Crallisa e Pas-chibe se ardiñará andré juicio contra os manuces de ocona rati, y os saplará, presas abílló de os fines de la pu á junelar a chaneleria de Salomon; y he acoi butér que Salomon andré ocona stano.Select Luke 11:31

32Os manuces de Ninive se ardiñarán contra ocona rati andré juicio, y la saplarán: presas quereláron penitencia á los goles de Jonás; y he acoi buter que Jonás andré ocona stano.Select Luke 11:32

33Cayque urdiflela á yeque mermellin, y la chitela andré yeque stano escondido, ni ostely de yeque melalo; sino opré yeque dendesquero, somia que junos sos abillelan andré diquelen a dut.Select Luke 11:33

34A mermellin de tun trupos sinela tun aqui. Si tun aqui sinare lachi, saro tun trupos sinará dutoso: tami si sinare chori, tambien tun trupos sinará bi dut.Select Luke 11:34

35Diquela pues, que a dut andré tucue, na sinela rachi.Select Luke 11:35

36Y andiar si saro tun trupos sinare dutoso, bi terelar yeque aricata de rachi, o saro sinará dutoso, y te diñará dut sasta yeque mermellin de dut.Select Luke 11:36

37Y pur sinaba chamuliando, le mangó yeque Phariséo, que chalase á jamar sat ó, y habiendo chalado andré, se besteló á la mensalle.Select Luke 11:37

38Y o Phariséo se chitó á penchabar, y penar andré de sí, presas na se había chobelado antes de jamar.Select Luke 11:38

39Y o Eraño penó: Acana sangue os Phariseyes chobelais lo de abrí e gote, y e plato; tami sangue de enrun sinelais perelalés de randipen y de choripen.Select Luke 11:39

40Dineles, ¿O sos quereló ma sinela de abrí, na quereló tambien ma sinela de enrun?Select Luke 11:40

41Ocono no obstante, diñelad limosna: y sarias as buchias os sinelan limpias.Select Luke 11:41

42¡Tami ysna de sangue, Phariseyes, sos chibelais andré deque aricatas a cha-lachi, y a Romani cha, y sari hortaliza, y na querelaís bajin e lachiria, y e amor de Debél! Pues sinaba mistos querelar oconas buchias, y na mequelar ocolas.Select Luke 11:42

43¡Ysna de sangue Phariseyes, sos camelais as brotoborias bestés andré as Synagogas, y sinelar saludados andré os maasqueres!Select Luke 11:43

44¡Ysna de sangue, sos sinelais sasta os sepulchres, sos na se diquela, y na lo chanelan os manuces, que pirelan por opré!Select Luke 11:44

45Y rudelando yeque es Chandés e Eschastra, le penó: Duquendio, chamuliando oconas buchias, tucue afrentas tambien á amangue.Select Luke 11:45

46Y ó penó: Y ysna de sangue Chandes e Eschastra: sos cargais os manuces de cargas, sos n’astis lliguerar, y sangue ni aun sat yeque de jiresias angustias pajabelais as cargas!Select Luke 11:46

47¡Ysna de sangue, sos querelais os sepulchres es Prophetas: y jires batuces os maráron!Select Luke 11:47

48Aromali diñelais á chanelar, que camelais ma quereláron jires batuces: ocolas os maráron, chachipén; tami sangue querelais desqueres sepulchres.Select Luke 11:48

49Por ocono penó tambien a chaneleria de Debél: Les bichabaré Prophetas y Apóstoles, y de junos mararán, y plastañarán para marar:Select Luke 11:49

50Somia que sinele pedida á ocona sueti a rati de sares os Prophetas, que sinaba chibada desde o principio de chiros.Select Luke 11:50

51Desde a rati de Abel, disde a rati de Zacharias, sos meró entre o altar, y a cangri. Andiar os penelo, que pedida sinará á ocona sueti.Select Luke 11:51

52¡Ysna de sangue, Chandés e Eschastra, sos ardiñasteis sat a clichi de chaneleria! sangue na chalasteis andré, y na mequelasteis á ocolas sos chalaban andré.Select Luke 11:52

53Y penando oconas buchias, os Phariseyes, y os Chandés e Eschastra se chibáron á chingarar con ó sat sila, y á trajatarle sat baribustrias preguntas,Select Luke 11:53

54Chibandole lazos, y orotando de sicobar de desquero sonsi yeque buchi somia astisar saplarle.Select Luke 11:54