14Zechariah 14

1Се, дние Господни грядут, и разделятся корысти твоя в тебе:Select Zechariah 14:1

2и соберу вся языки на Иерусалим в брань, и пленится град, и расхитятся домове, и жены осквернятся: и изыдет пол града в пленение, а останок людий Моих не потребятся от града.Select Zechariah 14:2

3И изыдет Господь и ополчится на языки оны, якоже день ополчения его в день брани.Select Zechariah 14:3

4И станут нозе Его в день он на горе Елеонстей, яже есть прямо Иерусалиму на восток: и разделится гора Елеонская, пол ея к востоком и пол ея к морю, пропасть велия зело: и уклонится пол горы на север и пол ея на юг:Select Zechariah 14:4

5и засыплется дебрь гор Моих, и прильпнет дебрь горняя даже до Асаила и наполнится, якоже наполнися от лица труса во днех Озии царя Иудова: и приидет Господь Бог мой, и вси святии с Ним.Select Zechariah 14:5

6И будет в день он, не будет свет, но зима и мраз:Select Zechariah 14:6

7и будет день един, и день той знаемь будет Господеви, и не день и не нощь, и при вечере будет свет.Select Zechariah 14:7

8И в день он изыдет вода жива из Иерусалима, пол ея в море первое и пол ея в море последнее: и в жатву и в весну будет тако.Select Zechariah 14:8

9И будет Господь в Царя по всей земли: в день он будет Господь един, и имя Его едино,Select Zechariah 14:9

10обходя всю землю и пустыню, от Гаваи и до Реммона, на юг Иерусалиму: и вознесется на месте и пребудет от врат Вениаминих до места врат первых, даже до врат уголных и до столпа Анамеиля и до подточилия царева.Select Zechariah 14:10

11И вселятся в нем, и анафема не будет ктому, и вселится Иерусалим надеяйся.Select Zechariah 14:11

12И сие будет падение, имже изсечет Господь вся люди, елицы воеваша на Иерусалим: истают плоти их стоящих на ногах своих, и очеса им истекут из обочий их, и язык их истает во устех их.Select Zechariah 14:12

13И будет в день он ужас Господень велий на них: и имутся кийждо за руку ближняго своего, и соплетется рука его к руце ближняго своего.Select Zechariah 14:13

14И Иуда ополчится во Иерусалиме и соберет крепость всех людий окрест, злато и сребро и ризы во множество зело.Select Zechariah 14:14

15И сие будет падение конем и мском, и велблюдом и ослом, и всем скотом сущым в полцех онех, по падению сему.Select Zechariah 14:15

16И будет, елицы аще останутся от всех язык пришедших на Иерусалим, и взыдут на всякое лето покланятися Царю Господу Вседержителю и праздновати праздник скинопигии.Select Zechariah 14:16

17И будет, елицы аще не взыдут от всех племен земли во Иерусалим поклонитися Царю Господу Вседержителю, и сии онем приложатся, не будет на них дождя.Select Zechariah 14:17

18Аще же колено Египетское не взыдет, ни приидет, и на сих будет язва, еюже поразит Господь вся языки, елицы аще не взыдут, еже праздновати праздник скинопигии.Select Zechariah 14:18

19Сей будет грех Египту и грех всем языком, елицы аще не взыдут, еже праздновати праздник скинопигии.Select Zechariah 14:19

20В день он будет еже во узде коня, свято Господу Вседержителю: и будут коноби в дому Господни яко чашы пред лицем олтаря,Select Zechariah 14:20

21и будет всяк коноб во Иерусалиме и во Иуде свят Господеви Вседержителю: и приидут вси жрущии и приимут от них и сварят в них, и не будет Хананей ктому во храме Господа Вседержителя в день он.Select Zechariah 14:21