32Exodus 32

1И видевше людие, яко умедли Моисей снити с горы, восташа людие на Аарона и глаголаша ему: востани и сотвори нам боги, иже пойдут пред нами: Моисей бо сей человек, иже изведе нас от земли Египетския, не вемы, что бысть ему.Select Exodus 32:1

2И рече им Аарон: измите усерязи златыя, яже во ушесех жен ваших и дщерей, и принесите ко мне.Select Exodus 32:2

3И изяша вси людие усерязи златы, яже во ушесех жен их, и принесоша ко Аарону.Select Exodus 32:3

4И взя от рук их и слия их делом литым, и сотвори им телца литаго. И рекоша: сии бози твои, Израилю, иже изведоша тя из земли Египетския.Select Exodus 32:4

5И видев Аарон, созда олтарь прямо ему, и проповеда Аарон, глаголя: праздник Господнь утре.Select Exodus 32:5

6И обутреневав наутрие, вознесе всесожжения и принесе жертву спасения. И седоша людие ясти и пити и восташа играти.Select Exodus 32:6

7И рече Господь к Моисею глаголя: иди скоро, сниди отсюду, беззаконноваша бо людие твои, ихже извел еси из земли Египетския:Select Exodus 32:7

8преступиша с пути скоро, егоже заповедал еси им: сотвориша себе телца, и поклонишася ему, и пожроша ему, и реша:Select Exodus 32:8

9сии бози твои, Израилю, иже изведоша тя из земли Египетския:Select Exodus 32:9

10и ныне остави Мя, и возярився гневом на ня, потреблю их, и сотворю тя в язык велик.Select Exodus 32:10

11И помолися Моисей пред Господем Богом и рече: вскую, Господи, яришися гневом на люди Твоя, ихже извел еси из земли Египетския крепостию великою и мышцею Твоею высокою?Select Exodus 32:11

12Да не когда рекут Египтяне, глаголюще: с лукавством изведе их погубити в горах и потребити их от земли: утоли гнев ярости Твоея и милостив буди о злобе людий Твоих,Select Exodus 32:12

13помянув Авраама и Исаака и Иакова, Твоя рабы, имже клялся еси Собою, и рекл еси к ним, глаголя: зело умножу семя ваше, яко звезды небесныя множеством, и всю сию землю, юже рекл еси дати семени их, и обладают ею во веки.Select Exodus 32:13

14И умилостивися Господь о зле, еже рече сотворити людем Своим.Select Exodus 32:14

15И возвратився Моисей, сниде с горы: и две скрижали свидения в руку его, скрижали каменны написаны от обою страну их, сюду и сюду быша написаны:Select Exodus 32:15

16и скрижали дело Божие быша, и написание, написание Божие изваяно на скрижалех.Select Exodus 32:16

17И услышав Иисус глас людий кричащих, рече к Моисею: глас ратный в полце.Select Exodus 32:17

18И рече Моисей: несть глас начинающих одолевати, ниже глас начинающих бежати, но глас начинающих напиватися вином аз слышу.Select Exodus 32:18

19И егда приближашеся к полку, узре телца и лики: и возярився гневом Моисей, поверже из руку своею обе скрижали, и сокруши я под горою:Select Exodus 32:19

20и взем телца, егоже сотвориша, сожже его во огни и сотре его подробну, и разсыпа его по воде, и напои ею сыны Израилевы.Select Exodus 32:20

21И рече Моисей Аарону: что сотвориша тебе людие сии, яко навел еси на них грех велик?Select Exodus 32:21

22И рече Аарон к Моисею: не гневайся, господине: ты бо веси людий сих устремление.Select Exodus 32:22

23Глаголаша бо ми: сотвори нам боги, иже пойдут пред нами: Моисей бо сей человек, иже изведе ны от Египта, не вемы, что бысть ему:Select Exodus 32:23

24и рекох им: иже имать злато, измите: и изяша, и даша мне, и ввергох е во огнь, и излияся телец сей.Select Exodus 32:24

25Видев же Моисей люди, яко разделишася, раздели бо их Аарон в порадование супостатом их:Select Exodus 32:25

26ста же Моисей во вратех полка и рече: аще кто есть Господнь, да идет ко мне. Снидошася убо к нему вси сынове Левиины.Select Exodus 32:26

27И рече им: сия глаголет Господь Бог Израилев: препояшите кийждо свой мечь при бедре и пройдите, и возвратитеся от врат до врат сквозе полк, и убийте кийждо брата своего и кийждо ближняго своего и кийждо соседа своего.Select Exodus 32:27

28И сотвориша сынове Левиины, якоже глагола им Моисей: и паде от людий в той день до трех тысящ мужей.Select Exodus 32:28

29И рече им Моисей: наполнисте руки вашя днесь Господу, кийждо в сыне своем и в брате своем, да дастся на вас благословение.Select Exodus 32:29

30И бысть на утрие, рече Моисей к людем: вы согрешисте грех велик: и ныне взыду к Богу, да умолю о гресе вашем.Select Exodus 32:30

31И возвратися Моисей ко Господу и рече: молюся ти, Господи: согрешиша людие сии грех велик и сотвориша себе боги златы:Select Exodus 32:31

32и ныне, аще убо оставиши им грех их, остави: аще же ни, изглади мя из книги Твоея, в нюже вписал еси.Select Exodus 32:32

33И рече Господь к Моисею: аще кто согреши предо Мною, изглажу его из книги Моея:Select Exodus 32:33

34ныне же иди, сниди и возведи люди сия на место, еже рех тебе: се, Ангел Мой предидет пред лицем твоим: в оньже день присещу, наведу на них грех их.Select Exodus 32:34

35И порази Господь люди за сотворение телца, егоже сотвори Аарон.Select Exodus 32:35