161 Corinthians 16

1Na, bihaun bicharahun ku in pasal sin pagtaw sīn hipanabang ha manga pagkahi niyu Almasihin suku sin Tuhan ha hula Yahudiya. Hinanga niyu isab in biya sin diyaakan ku ha manga jamaa Almasihin ha hula Galatiya.Select 1 Corinthians 16:1

2Sakahaba adlaw Ahad subay niyu kandihun in sīn, amu in ganta hipanabang niyu pakaniya-pakaniya. In taud sin hipanabang niyu, subay da isab magtungud iban sin taud sin nausaha niyu, (hāti niya bang mataud in nausaha niyu, subay da isab mataud in hirihil niyu, sa bang hangkatiyu da, na, hangkatiyu da isab in hirihil niyu). Tawan niyu in sīn yan ha supaya pagdatung ku mawn saddiya na in tutulungan niyu.Select 1 Corinthians 16:2

3Bang aku dumatung na mawn kaniyu, daakun ku in manga tau amu in napī niyu kapangandulan dumā sin tutulungan niyu pa Awrusalam. Dihilan ku sila sulat, amu in magpakila kanila ha manga tau Awrusalam.Select 1 Corinthians 16:3

4Bang kagunahan tuud subay aku magbaran humatud sin tutulungan, na, magagad aku iban sin manga tau yan pa Awrusalam.Select 1 Corinthians 16:4

5In ganta ku bihaun, mawn kaniyu, sagawa madtu aku muna pa hula Makidun. Bang ku maubus na malatag in manga Almasihin duun ampa aku mawn kaniyu.Select 1 Corinthians 16:5

6Kalu-kalu aku makalugay duun kaniyu. Maray papuasun ku naa in timpu panghangin, ampa ku hilanjal in tulak ku, sukul mapaintul niyu in pagtulak ku pakain-pakain na in kadtuun ku.Select 1 Corinthians 16:6

7Di aku mabaya tumibaw mawn kaniyu day-day sadja. In kabayaan ku makalugay-lugay aku duun kaniyu, bang isab dayn ha kabayaan da sin Tuhan.Select 1 Corinthians 16:7

8Sagawa dimī naa aku ha Ipisus sampay mapuas in adlaw sin paghinang pagtawagun Kayman.Select 1 Corinthians 16:8

9Sabab awn tuud lugal ku magnasīhat dī ha ini. Minsan mataud in simusulang kāku, mataud da isab in mabaya dumungug sin pagnasīhat ku.Select 1 Corinthians 16:9

10Bang hi Timuti dumatung na mawn kaniyu, ayuputa niyu tuud siya marayaw, sabab in siya yan biya da isab kāku naghuhulas-sangsa pa Tuhan.Select 1 Corinthians 16:10

11Hangkan ayaw niyu siya baba-babaa. Gām mayan paintula niyu tuud siya bat marayaw in pagtulak-tulak niya. Hāti, makabalik siya mari kāku, sabab tiyatagaran ku in datung niya iban sin manga kaibanan taymanghud natu.Select 1 Corinthians 16:11

12Na, ha pasal isab sin taymanghud natu hi Apullus. Nakamataud ku na siya liyugus paagarun ha manga taymanghud natu tumibaw mawn kaniyu, sagawa wayruun pa tuud baya niya magad ha bihaun. Malayngkan, timibaw da siya kunu kaniyu bang awn na waktu niya.Select 1 Corinthians 16:12

13Jaga kamu. Pahuguta niyu in pangandul niyu kan Īsa Almasi. Ayaw kamu magawa. Iban pakitaan niyu in kusug niyu.Select 1 Corinthians 16:13

14Iban unu-unu na in hinangun niyu, pakitaan niyu in kasi-lasa niyu ha pagkahi niyu.Select 1 Corinthians 16:14

15Na, manga taymanghud ku, maray kaingatan niyu da isab in pasal hi Istipanus iban sin manga anak-asawa niya. Sila yan in miyuna nagparachaya ha Panghu Īsa duun ha hula Akaya. Matuyu tuud sila tumabang ha manga tau suku sin Tuhan. Na, junjungun ku kaniyu, manga taymanghud ku,Select 1 Corinthians 16:15

16pagkahagad kamu sin hindu sin manga tau biya kanda Istipanus iban sin manga tau timatabang kanila ha hinang nila.Select 1 Corinthians 16:16

17Makuyag aku sin dimatung mari hinda Istipanus, Pultunatu, iban hi Akiyus. Minsan kamu di makakari katān, in pagdatung nila mari biya nakaubat sin tumtum ku kaniyu.Select 1 Corinthians 16:17

18Sabab piyakuyag nila in atay ku biya da isab sin pagpakuyag nila sin atay niyu. In manga tau biya kanila subay niyu pagaddatan.Select 1 Corinthians 16:18

19Na, magpasampay sin salam-duwaa nila kaniyu in manga jamaa Almasihin ha hula Asiya. Damikkiyan, in hi Akili iban sin asawa niya hi Pirisila sampay sin manga tau agad kan Īsa magtitipun mangarap pa Tuhan duun ha bāy nila, magpasampay da isab sin salam-duwaa nila kaniyu, sabab in sila isab pagkahi niyu agad ha Panghu.Select 1 Corinthians 16:19

20Damikkiyan, magpasampay da isab sin salam-duwaa nila kaniyu, in manga taymanghud natu katān dī. Bang kamu magbāk iban sin manga pagkahi niyu Almasihin, pagsiyum kamu, tanda sin paglasa-liyasahi niyu.Select 1 Corinthians 16:20

21Mahuli dayn duun yari in salam-duwaa ku kaniyu katān, amu siyulat ku tuud sin baran ku. Aku hi Paul.Select 1 Corinthians 16:21

22Hisiyu-siyu in di malasa ha Panghu Īsa kugdanan siya sin murka sin Tuhan. Sumagawa in hibichara ku kaniyu, “Maranata”, hāti niya, “Ū, Panghu bang mayan kaw magbalik na.”Select 1 Corinthians 16:22

23Mura-murahan bang mayan di mabugtu in tulung-tabang kaniyu sin Panghu natu Īsa Almasi.Select 1 Corinthians 16:23

24Kalasahan ta kamu katān sabab suku kamu hi Īsa Almasi. Wassalam.Select 1 Corinthians 16:24