1¶ Bai mi blesim BIKPELA long olgeta taim. Wok bilong litimapim nem bilong Em bai stap olgeta taim long maus bilong mi.
2Tewel bilong mi bai i givim biknem long BIKPELA. Ol man i save holim pasin bilong daunim ol yet bai harim tok long dispela, na stap belgut.
3O, liptimapim nem bilong BIKPELA wantaim mi, na yumi wantaim i ken litimapim nem bilong Em.
4Mi bin wok long painim BIKPELA, na Em i bin harim mi na tekewe mi long olgeta pret bilong mi.
5Ol i lukluk i go long Em, na Em i givim lait long ol, na ol pes bilong ol i no sem.
6Dispela rabisman i bin singaut, na BIKPELA i bin harim em na kisim bek em long olgeta hevi bilong em.
7Ensel bilong BIKPELA i wokim kem nabaut long ol manmeri i pret long BIKPELA, na em i save tekewe ol long bagarap.
8O, traim na lukim, BIKPELA em i gutpela. Blesing i stap long man i putim bilip bilong em long Em.
9O, yupela ol seint bilong BIKPELA, yupela i mas pret long Em. Long wanem ol man i pret long Em ol i no sot long wanpela samting.
10Ol yangpela laion i sot long kaikai, na ol i pilim hangre. Tasol ol man i wok long painim BIKPELA bai ol i no sot long wanpela gutpela samting.
11¶ Yupela pikinini, yupela i mas kam na harim tok bilong mi. Bai mi skulim yupela long pret long BIKPELA.
12Husat man i laikim laip na i laikim tru planti de bai em i ken lukim gutpela samting?
13Yu mas lukautim tang bilong yu long em i stap longwe long tok nogut, na maus bilong yu long em i no ken tok giaman.
14Yu mas lusim pasin nogut na mekim gutpela pasin. Yu mas wok long painim bel isi na ranim bilong kisim dispela.
15Ol ai bilong BIKPELA i stap long ol stretpela man, na ia bilong Em i op long krai bilong ol.
16Pes bilong BIKPELA i birua long ol man i mekim pasin nogut, na bai Em i rausim tingting long nem bilong ol long dispela graun.
17Ol stretpela man i singaut, na BIKPELA i harim. Na Em i tekewe ol long olgeta hevi bilong ol.
18BIKPELA i stap klostu long ol man i gat bikpela bel hevi. Na Em i kisim bek kain man i gat spirit i sori tru.Notes
19Ol hevi bilong stretpela man ol i planti. Tasol BIKPELA i save tekewe em long olgeta hevi.
20Em i lukautim olgeta bun bilong em. I no gat wanpela i bruk.
21Pasin nogut bai kilim i dai ol man I mekim pasin nogut. Na ol man i no laikim tru stretpela man bai ol i gat asua.
22BIKPELA i save baim bek tewel bilong ol wokboi bilong Em. Na i no gat wanpela bilong ol man i bilip long Em bai i gat asua.
King Jems Pisin Baibel Tap a verse to copy, share, highlight or add a note. Dotted words link to encyclopedia articles.
22 verses in this psalm
34 / 150 psalms
The text is King Jems Pisin Baibel(톡피신어) — From getbible.net (CrossWire SWORD module) · license: CC BY-NC-ND 4.0 (Creative Commons: BY-NC-ND 4.0) Highlights, notes and read marks stay with the chapter whichever version you read. Dotted words are people, places and terms that have an encyclopedia article (marked once per page). Highlights, notes and read marks are saved only in this browser and gathered under My marks.