Psalms 128
King Jems Pisin Baibel
1 ¶ Blesing i stap long olgeta wan wan man i pret long BIKPELA, em man i wokabaut long ol rot bilong Em.
2 Long wanem bai yu kaikai samting ol han bilong yu i hatwok long kamapim. Bai yu stap amamas, na bai ol samting bilong yu i stap gut.
3 Meri bilong yu bai stap olsem rop i karim planti kaikai arere long haus bilong yu. Ol pikinini bilong yu bai stap olsem ol diwai oliv nabaut long tebol bilong yu.
4 Harim, man i pret long BIKPELA bai i kisim blesing olsem dispela.
5 BIKPELA bai i givim blesing long yu i kam long Saion. Na olgeta de bilong laip bilong yu bai yu lukim gutpela samting i kamap long Jerusalem.
6 Yes, bai yu lukim ol pikinini bilong ol pikinini bilong yu. Na bai yu lukim bel isi i kam long Israel.
About this translation
King Jems Pisin Baibel ·
King Jems Pisin Baibel
Creative Commons: BY-NC-ND 4.0 · Translation source
Dispela wok bilong tanim tok em i wok bilong David Holland na Bryan Girard. Version 1.2