Psalms 137

1 ¶ Klostu long ol bikwara bilong Babilon, mipela i bin i sindaun long dispela hap. Yes, mipela i bin krai, taim mipela i tingim gen Saion.

2 Mipela i bin hangamapim ol harp bilong mipela long ol diwai wilo namel long en.

3 Long wanem ol man i bin karim mipela i go kalabus ol i bin makim mipela long singim wanpela song long dispela hap. Na ol man i bin bagarapim mipela ol i bin makim mipela long amamas bikpela. Ol i bin tok, Yupela i mas singim wanpela bilong ol song bilong Saion long mipela.

4 Olsem wanem bai mipela i singim song bilong BIKPELA long narapela hap graun?

5 O Jerusalem, sapos mi lusim tingting long yu, orait han sut bilong mi i ken lusim tingting long save bilong en.

6 Sapos mi no tingim yu gen, na sapos mi no laikim Jerusalem moa long mi laikim nambawan amamas bilong mi, orait tang bilong mi i ken pas long antap bilong maus bilong mi.

7 ¶ O BIKPELA, Yu mas tingim gen ol pikinini bilong Edom long de bilong Jerusalem. Ol i bin tok, Bagarapim em olgeta. Bagarapim em olgeta, inap long ol as ston bilong en.

8 O pikinini meri bilong Babilon, ol i mas bagarapim yu. Man i bekim pe long yu, olsem yu bin mekim long mipela, bai em i stap amamas.

9 Man i kisim ol liklik pikinini bilong yu na brukim ol nabaut long ol ston, bai em i stap amamas.