Psalms 5

1 ¶ O BIKPELA, Yu mas givim ia long ol tok bilong mi. Yu mas tingting na skelim ol tingting strong bilong mi.

2 King bilong mi na God bilong mi, Yu mas harim nek bilong singaut bilong mi. Long wanem mi bai beten long Yu.

3 O BIKPELA, bai Yu harim nek bilong mi long moningtaim. Long moningtaim bai mi salim prea bilong mi i go long Yu, na bai mi lukluk i go antap.

4 Long wanem Yu no wanpela God i save amamas long pasin i nogut tru. Na tu samting nogut bai i no stap wantaim Yu.

5 Ol krankiman bai i no sanap long ai bilong Yu. Yu no laikim tru olgeta man i mekim sin nogut.

6 Bai Yu bagarapim ol man i mekim tok giaman. BIKPELA bai les tru long man i kapsaitim blut na tok giaman.

7 ¶ Tasol long mi, long ol planti sori bilong Yu, bai mi kam insait long haus bilong Yu. Na long pasin bilong pret long Yu, bai mi lukluk i go long tempel holi bilong Yu na bai mi lotu.

8 O BIKPELA, Yu mas stiaim mi long stretpela pasin bilong Yu. Long wanem ol birua bilong mi i stap. Yu mas mekim pasin bilong Yu i stretpela long pes bilong mi.

9 Long wanem, pasin bilong mekim tok yu inap bilip long em I no stap long maus bilong ol. Insait bilong ol i nogut tru tasol. Nek bilong ol i wanpela matmat i op. Long tang bilong ol, ol i save tok gris.

10 O God, Yu mas bagarapim ol. Yu mas larim ol i pundaun long ol tok helpim bilong ol yet. Long planti sin bilong ol long brukim lo, Yu mas rausim ol i go. Long wanem ol i bin sakim tok bilong Yu.

11 Tasol olgeta man i putim bilip bilong ol long Yu, larim ol i amamas tru. Oltaim ol i ken bikmaus bilong amamas, long wanem Yu save lukautim ol. Na tu ol man i laikim tru nem bilong Yu, ol i ken amamas long Yu.

12 Long wanem BIKPELA, Yu bai blesim ol stretpela man. Bai Yu raunim em long pasin bilong laikim olsem man i mekim long hap plang.