27Deuteronomy 27

1Præcepit autem Moyses et seniores Israël populo, dicentes : Custodite omne mandatum quod præcipio vobis hodie.Select Deuteronomy 27:1

2Cumque transieritis Jordanem in terram, quam Dominus Deus tuus dabit tibi, eriges ingentes lapides, et calce lævigabis eos,Select Deuteronomy 27:2

3ut possis in eis scribere omnia verba legis hujus, Jordane transmisso : ut introëas terram, quam Dominus Deus tuus dabit tibi, terram lacte et melle manantem, sicut juravit patribus tuis.Select Deuteronomy 27:3

4Quando ergo transieritis Jordanem, erigite lapides, quos ego hodie præcipio vobis in monte Hebal, et lævigabis eos calce :Select Deuteronomy 27:4

5et ædificabis ibi altare Domino Deo tuo de lapidibus, quos ferrum non tetigit,Select Deuteronomy 27:5

6et de saxis informibus et impolitis : et offeres super eo holocausta Domino Deo tuo,Select Deuteronomy 27:6

7et immolabis hostias pacificas, comedesque ibi, et epulaberis coram Domino Deo tuo.Select Deuteronomy 27:7

8Et scribes super lapides omnia verba legis hujus plane et lucide.Select Deuteronomy 27:8

9Dixeruntque Moyses et sacerdotes Levitici generis ad omnem Israëlem : Attende, et audi, Israël : hodie factus es populus Domini Dei tui :Select Deuteronomy 27:9

10audies vocem ejus, et facies mandata atque justitias, quas ego præcipio tibi.Select Deuteronomy 27:10

11Præcepitque Moyses populo in die illo, dicens :Select Deuteronomy 27:11

12Hi stabunt ad benedicendum populo super montem Garizim, Jordane transmisso : Simeon, Levi, Judas, Issachar, Joseph, et Benjamin.Select Deuteronomy 27:12

13Et e regione isti stabunt ad maledicendum in monte Hebal : Ruben, Gad, et Aser, et Zabulon, Dan, et Nephthali.Select Deuteronomy 27:13

14Et pronuntiabunt Levitæ, dicentque ad omnes viros Israël excelsa voce :Select Deuteronomy 27:14

15Maledictus homo qui facit sculptile et conflatile, abominationem Domini, opus manuum artificum, ponetque illud in abscondito : et respondebit omnis populus, et dicet : Amen.Select Deuteronomy 27:15

16Maledictus qui non honorat patrem suum, et matrem : et dicet omnis populus : Amen.Select Deuteronomy 27:16

17Maledictus qui transfert terminos proximi sui : et dicet omnis populus : Amen.Select Deuteronomy 27:17

18Maledictus qui errare facit cæcum in itinere : et dicet omnis populus : Amen.Select Deuteronomy 27:18

19Maledictus qui pervertit judicium advenæ, pupilli et viduæ : et dicet omnis populus : Amen.Select Deuteronomy 27:19

20Maledictus qui dormit cum uxore patris sui, et revelat operimentum lectuli ejus : et dicet omnis populus : Amen.Select Deuteronomy 27:20

21Maledictus qui dormit cum omni jumento : et dicet omnis populus : Amen.Select Deuteronomy 27:21

22Maledictus qui dormit cum sorore sua, filia patris sui, vel matris suæ : et dicet omnis populus : Amen.Select Deuteronomy 27:22

23Maledictus qui dormit cum socru sua : et dicet omnis populus : Amen.Select Deuteronomy 27:23

24Maledictus qui clam percusserit proximum suum : et dicet omnis populus : Amen.Select Deuteronomy 27:24

25Maledictus qui accipit munera, ut percutiat animam sanguinis innocentis : et dicet omnis populus : Amen.Select Deuteronomy 27:25

26Maledictus qui non permanet in sermonibus legis hujus, nec eos opere perficit : et dicet omnis populus : Amen.Select Deuteronomy 27:26