17Luke 17

1And Jhesu seide to hise disciplis, It is impossible that sclaundris come not; but wo to that man, bi whom thei comen.Select Luke 17:1

2It is more profitable to him, if a mylne stoon be put aboute his necke, and he be cast in to the see, than that he sclaundre oon of these litle.Select Luke 17:2

3Take ye hede you silf; if thi brothir hath synned ayens thee, blame hym; and if he do penaunce, foryyue hym.Select Luke 17:3

4And if seuene sithis in the dai he do synne ayens thee, and seuene sithis in the dai he be conuertid to thee, and seie, It forthenkith me, foryyue thou hym.Select Luke 17:4

5And the apostlis seiden to the Lord, Encrese to vs feith.Select Luke 17:5

6And the Lord seide, If ye han feith as the corn of seneuei, ye schulen seie to this more tre, Be thou drawun vp bi the rote, and be ouerplauntid in to the see, and it schal obeie to you.Select Luke 17:6

7But who of you hath a seruaunt erynge, or lesewynge oxis, which seith to hym, whanne he turneth ayen fro the feeld, Anoon go, and sitte to mete;Select Luke 17:7

8and seith not to hym, Make redi, that Y soupe, and girde thee, and serue me, while Y ete and drynke, and aftir this thou schalt ete and drynke;Select Luke 17:8

9whether he hath grace to that seruaunt, for he dide that that he comaundide hym?Select Luke 17:9

10Nay, Y gesse. So ye, whanne ye han don alle thingis that ben comaundid to you, seie ye, We ben vnprofitable seruauntis, we han do that that we ouyten to do.Select Luke 17:10

11And it was do, the while Jhesus wente in to Jerusalem, he passide thorou the myddis of Samarie, and Galilee.Select Luke 17:11

12And whanne he entride in to a castel, ten leprouse men camen ayens hym, whiche stoden afer,Select Luke 17:12

13and reiseden her voys, and seiden, Jhesu, comaundoure, haue merci on vs.Select Luke 17:13

14And as he say hem, he seide, Go ye, `schewe ye you to the prestis. And it was don, the while thei wenten, thei weren clensid.Select Luke 17:14

15And oon of hem, as he saiy that he was clensid, wente ayen, magnifiynge God with grete vois.Select Luke 17:15

16And he fel doun on the face bifore hise feet, and dide thankyngis; and this was a Samaritan.Select Luke 17:16

17And Jhesus answerde, and seide, Whether ten ben not clensid, and where ben the nyne?Select Luke 17:17

18There is noon foundun, that turnede ayen, and yaf glorie to God, but this alien.Select Luke 17:18

19And he seide to hym, Rise vp, go thou; for thi feith hath maad thee saaf.Select Luke 17:19

20And he was axid of Farisees, whanne the rewme of God cometh. And he answerde to hem, and seide, The rewme of God cometh not with aspiyng,Select Luke 17:20

21nether thei schulen seie, Lo! here, or lo there; for lo! the rewme of God is with ynne you.Select Luke 17:21

22And he seide to hise disciplis, Daies schulen come, whanne ye schulen desire to se o dai of mannus sone, and ye schulen not se.Select Luke 17:22

23And thei schulen seie to you, Lo! here, and lo there. Nyle ye go, nether sue ye;Select Luke 17:23

24for as leyt schynynge from vndur heuene schyneth in to tho thingis that ben vndur heuene, so schal mannus sone be in his dai.Select Luke 17:24

25But first it bihoueth hym to suffre many thingis, and to be repreued of this generacioun.Select Luke 17:25

26And as it was doon in the daies of Noe, so it schal be in the daies of mannys sone.Select Luke 17:26

27Thei eeten and drunkun, weddiden wyues, and weren youun to weddyngis, til in to the dai in the whych Noe entride in to the schip; and the greet flood cam, and loste alle.Select Luke 17:27

28Also as it was don in the daies of Loth, thei eeten and drunkun, bouyten and seelden, plauntiden and bildiden; but the dai that Loth wente out of Sodome,Select Luke 17:28

29the Lord reynede fier and brymstoon fro heuene, and loste alle.Select Luke 17:29

30Lijk this thing it schal be, in what dai mannys sone schal be schewid.Select Luke 17:30

31In that our he that is in the roof, and his vessels in the hous, come he not doun to take hem awei; and he that schal be in the feeld, also turne not ayen bihynde.Select Luke 17:31

32Be ye myndeful of the wijf of Loth.Select Luke 17:32

33Who euer seketh to make his lijf saaf, schal leese it; and who euer leesith it, schal quykene it.Select Luke 17:33

34But Y seie to you, in that nyyt twei schulen be in o bed, oon schal be takun, and the tothir forsakun;Select Luke 17:34

35twei wymmen schulen be gryndynge togidir, `the toon schal be takun, and `the tother forsakun; twei in a feeld, `the toon schal be takun, and `the tother left.Select Luke 17:35

36Thei answeren, and seien to hym, Where, Lord?Select Luke 17:36

37Which seide to hym, Where euer the bodi schal be, thidur schulen be gaderid togidere also the eglis.Select Luke 17:37