24Acts 24

1And aftir fyue daies, Ananye, prince of preestis, cam doun with summe eldere men, and Terculle, a feir speker, which wenten to the precident ayens Poul.Select Acts 24:1

2And whanne Poul was somened, Terculle bigan to accuse hym, and seide, Whanne in myche pees we doon bi thee, and many thingis ben amendid bi thi wisdom, euere more and euery where,Select Acts 24:2

3thou best Felix, we han resseyued with al doyng of thankingis.Select Acts 24:3

4But lest Y tarie thee lengere, Y preie thee, schortly here vs for thi mekenesse.Select Acts 24:4

5We han foundun this wickid man stirynge dissencioun to alle Jewis in al the world, and auctour of dissencioun of the secte of Nazarenus; and he also enforside to defoule the temple;Select Acts 24:5

6whom also we token, and wolden deme, after oure lawe.Select Acts 24:6

7But Lisias, the trybune, cam with greet strengthe aboue, and delyuerede hym fro oure hoondis;Select Acts 24:7

8and comaundide hise accuseris to come to thee, of whom thou demynge, maist knowe of alle these thingis, of whiche we accusen hym.Select Acts 24:8

9And Jewis putten to, and seiden, that these thingis hadden hem so.Select Acts 24:9

10And Poul answeride, whanne the president grauntide hym to seie, Of mony yeeris Y knowe thee, that thou art domesman `to this folk, and Y schal do ynowy for me with good resoun.Select Acts 24:10

11For thou maist knowe, for to me ben not more than twelue daies, sithen Y cam vp to worschipe in Jerusalem;Select Acts 24:11

12and nether in the temple thei founden me disputinge with ony man, nether makynge concours of puple, nether in synagogis, nether in citee;Select Acts 24:12

13nether thei moun preue to thee, of the whiche thingis thei now accusen me.Select Acts 24:13

14But Y knowleche to thee this thing, that aftir the secte which thei seien eresie, so Y serue to God the fadir, `and Y bileue to alle thingis that ben writun in the lawe and profetis; and Y haue hope in God,Select Acts 24:14

15whiche also thei hem silf abiden, the ayenrisyng `to comynge of iust men and wickid.Select Acts 24:15

16In this thing Y studie with outen hirtyng, to haue concience to God, and to men euermore.Select Acts 24:16

17But after many yeeris, Y cam to do almes dedis to my folc, and offryngis, and auowis;Select Acts 24:17

18in whiche thei founden me purified in the temple, not with company, nether with noise. And thei cauyten me, and thei crieden, and seiden, Take awei oure enemye.Select Acts 24:18

19And summe Jewis of Asie, whiche it behofte to be now present at thee, and accuse, if thei hadden ony thing ayens me,Select Acts 24:19

20ether these hem silf seie, if thei founden in me ony thing of wickidnesse, sithen Y stonde `in the counsel,Select Acts 24:20

21but oneli of this vois, by which Y criede stondynge among hem, For of the ayenrisyng of deed men Y am demyd this dai of you.Select Acts 24:21

22Sothely Felix delayede hem, and knewe moost certeynli of the weie, and seide, Whanne Lisias, the tribune, schal come doun, Y schal here you.Select Acts 24:22

23And he comaundide to a centurien to kepe hym, and that he hadde reste, nethir to forbede ony man to mynystre of his owne thingis to him.Select Acts 24:23

24And after summe dayes Felix cam, with Drussille his wijf, that was a Jewesse, and clepide Poul, and herde of him the feith that is in Crist Jhesu.Select Acts 24:24

25And while he disputide of riytwisnesse, and chastite, and of dom to comynge, Felix was maad tremblinge, and answerde, That perteneth now, go; but in tyme couenable Y schal clepe thee.Select Acts 24:25

26Also he hopide, that money schulde be youun to hym of Poul; for which thing eft he clepide hym, and spak with hym.Select Acts 24:26

27And whanne twei yeeris weren fillid, Felix took a successoure, Porcius Festus; and Felix wolde yyue grace to Jewis, and lefte Poul boundun.Select Acts 24:27