10Jeremiah 10

1The hous of Israel, here ye the word which the Lord spak on you.Select Jeremiah 10:1

2The Lord seith these thingis, Nyle ye lerne aftir the weies of hethene men, and nyle ye drede of the signes of heuene, whiche signes hethene men dreden.Select Jeremiah 10:2

3For the lawis of puplis ben veyn, for whi the werk of hondis of a crafti man hath kit doun with an axe a tre of the forest.Select Jeremiah 10:3

4He made it fair with siluer and gold; with naylis and hameris he ioynede it togidere, that it be not loosid.Select Jeremiah 10:4

5Idols ben maad in the licnesse of a palm tree, and schulen not speke; tho schulen be takun and be borun, for tho moun not go; therfor nyle ye drede tho, for tho moun nether do yuel, nethir wel.Select Jeremiah 10:5

6Lord, noon is lijk thee; thou art greet, and thi name is greet in strengthe.Select Jeremiah 10:6

7A! thou king of folkis, who schal not drede thee? for whi onour is thin among alle wise men of hethene men, and in alle the rewmes of hem noon is lijk thee.Select Jeremiah 10:7

8Thei schulen be preued, vnwise and foolis togidere; the techyng of her vanyte is a tre.Select Jeremiah 10:8

9Siluer wlappid is brouyt fro Tharsis, and gold fro Ophaz; it is the werk of a crafti man, and of the hond of a worchere in metel; iacynct and purpur ben the clothing of tho; alle these thingis ben the werk of werk men.Select Jeremiah 10:9

10Forsothe the Lord is veri God; he is God lyuynge, and a kyng euerlastynge; the erthe schal be mouyd togidere of his indignacioun, and hethene men schulen not suffre the manaassing of hym.Select Jeremiah 10:10

11Therfor thus ye schulen seie to hem, Goddis that maden not heuene and erthe, perische fro erthe, and fro these thingis that ben vndur heuene.Select Jeremiah 10:11

12He is God, that makith the erthe in his strengthe, makith redi the world in his wisdom, and stretchith forth heuenes bi his prudence.Select Jeremiah 10:12

13At his vois he yyueth the multitude of watris in heuene, and he reisith mystis fro the endis of erthe; he makith leitis into reyn, and ledith out wynd of his tresouris.Select Jeremiah 10:13

14Ech man is maad a fool of kunnyng, ech crafti man is schent in a grauun ymage; for whi that that he wellide togidere is fals, and no spirit is in tho.Select Jeremiah 10:14

15Tho ben veyn, and a werk worthi of scorn; tho schulen perische in the tyme of her visitacioun.Select Jeremiah 10:15

16The part of Jacob is not lijk these, for he that formede alle thingis is God of Jacob, and Israel is the yerde of his eritage; the Lord of oostis is name to hym.Select Jeremiah 10:16

17Thou that dwellist in bisegyng, gadere fro the lond thi schenschipe;Select Jeremiah 10:17

18for the Lord seith these thingis, Lo! Y schal caste awei fer the dwelleris of the loond in this while; and Y schal yyue tribulacioun to hem, so that thei be not foundun.Select Jeremiah 10:18

19Wo to me on my sorewe, my wounde is ful yuel; forsothe Y seide, Pleynli this is my sikenesse, and Y schal bere it.Select Jeremiah 10:19

20My tabernacle is distried, alle my roopis ben brokun; my sones yeden out fro me, and ben not; noon is that schal stretche forth more my tente, and schal reyse my skynnes.Select Jeremiah 10:20

21For the scheepherdis diden folili, and souyten not the Lord; therfor thei vndurstoden not, and alle the flok of hem is scaterid.Select Jeremiah 10:21

22Lo! the vois of hering cometh, and a greet mouynge togidere fro the lond of the north, that it sette the citees of Juda in to wildirnesse, and a dwellynge place of dragouns.Select Jeremiah 10:22

23Lord, Y woot, that the weie of a man is not of hym, nether it is of a man that he go, and dresse hise steppis.Select Jeremiah 10:23

24Lord, chastise thou me; netheles in doom and not in thi strong veniaunce, lest perauenture thou dryue me to nouyt.Select Jeremiah 10:24

25Schede out thin indignacioun on hethene men that knewen not thee, and on prouynces that clepiden not thi name to help; for thei eeten Jacob, and deuouriden hym, and wastiden hym, and destrieden the onour of hym.Select Jeremiah 10:25