2John 2

1And the thridde dai weddyngis weren maad in the Cane of Galilee; and the modir of Jhesu was there.Select John 2:1

2And Jhesus was clepid, and hise disciplis, to the weddyngis.Select John 2:2

3And whanne wijn failide, the modir of Jhesu seide to hym, Thei han not wijn.Select John 2:3

4And Jhesus seith to hir, What to me and to thee, womman? myn our cam not yit.Select John 2:4

5His modir seith to the mynystris, What euere thing he seie to you, do ye.Select John 2:5

6And there weren set `sixe stonun cannes, aftir the clensyng of the Jewis, holdynge ech tweyne ether thre metretis.Select John 2:6

7And Jhesus seith to hem, Fille ye the pottis with watir. And thei filliden hem, vp to the mouth.Select John 2:7

8And Jhesus seide to hem, Drawe ye now, and bere ye to the architriclyn. And thei baren.Select John 2:8

9And whanne the architriclyn hadde tastid the watir maad wiyn, and wiste not wherof it was, but the mynystris wisten that drowen the watir, the architriclyn clepith the spouse,Select John 2:9

10and seith to hym, Ech man settith first good wiyn, and whanne men ben fulfillid, thanne that that is worse; but thou hast kept the good wiyn `in to this tyme.Select John 2:10

11Jhesus dide this the bigynnyng of signes in the Cane of Galilee, and schewide his glorie; and hise disciplis bileueden in hym.Select John 2:11

12Aftir these thingis he cam doun to Cafarnaum, and his modir, and hise britheren, and hise disciplis; and thei dwelliden `there not many daies.Select John 2:12

13And the pask of Jewis was nyy, and Jhesus wente vp to Jerusalem.Select John 2:13

14And he foond in the temple men sillynge oxun, and scheep, and culueris, and chaungeris sittynge.Select John 2:14

15And whanne he hadde maad as it were a scourge of smale cordis, he droof out alle of the temple, and oxun, and scheep; and he schedde the money of chaungeris, and turnede vpsedoun the boordis.Select John 2:15

16And he seide to hem that selden culueris, Take awei fro hennus these thingis, and nyle ye make the hous of my fadir an hous of marchaundise.Select John 2:16

17And hise disciplis hadden mynde, for it was writun, The feruent loue of thin hous hath etun me.Select John 2:17

18Therfor the Jewis answeriden, and seiden to hym, What token schewist thou to vs, that thou doist these thingis?Select John 2:18

19Jhesus answerde, and seide to hem, Vndo ye this temple, and in thre daies Y schal reise it.Select John 2:19

20Therfor the Jewis seiden to hym, In fourti and sixe yeer this temple was bildid, and schalt thou in thre daies reise it?Select John 2:20

21But he seide of the temple of his bodi.Select John 2:21

22Therfor whanne he was risun fro deeth, hise disciplis hadden mynde, that he seide these thingis of his bodi; and thei bileueden to the scripture, and to the word that Jhesus seide.Select John 2:22

23And whanne Jhesus was at Jerusalem in pask, in the feeste dai, many bileueden in his name, seynge his signes that he dide.Select John 2:23

24But Jhesus trowide not hym silf to hem, for he knewe alle men;Select John 2:24

25and for it was not nede to hym, that ony man schulde bere witnessyng, for he wiste, what was in man.Select John 2:25