1Jeremiah 1

1The wordis of Jeremye, sone of Helchie, of the preestis that weren in Anathot, in the lond of Beniamyn.Select Jeremiah 1:1

2For the word of the Lord was maad to hym in the daies of Josie, the sone of Amon, kyng of Juda, in the threttenethe yeer of his rewme.Select Jeremiah 1:2

3And it was don in the daies of Joachym, the sone of Josie, the king of Juda, til to the endyng of the enleuenthe yeer of Sedechie, sone of Josie, kyng of Juda, til the passyng ouer, ether caitifte, of Jerusalem, in the fyuethe monethe.Select Jeremiah 1:3

4And the word of the Lord was maad to me,Select Jeremiah 1:4

5and seide, Bifor that Y fourmede thee in the wombe, Y knewe thee; and bifor that thou yedist out of the wombe, Y halewide thee; and Y yaf thee a profete among folkis.Select Jeremiah 1:5

6And Y seide, A! A! A! Lord God, lo! Y kan not speke, for Y am a child.Select Jeremiah 1:6

7And the Lord seide to me, Nyle thou seie, that Y am a child; for thou schalt go to alle thingis, to whiche Y schal sende thee, and thou schalt speke alle thingis, what euer thingis Y schal comaunde to thee.Select Jeremiah 1:7

8Drede thou not of the face of hem, for Y am with thee, to delyuere thee, seith the Lord.Select Jeremiah 1:8

9And the Lord sente his hond, and touchide my mouth; and the Lord seide to me, Lo! Y haue youe my wordis in thi mouth; lo!Select Jeremiah 1:9

10Y haue ordeynede thee to day on folkis, and on rewmes, that thou drawe vp, and distrie, and leese, and scatere, and bilde, and plaunte.Select Jeremiah 1:10

11And the word of the Lord was maad to me, and seide, What seest thou, Jeremye?Select Jeremiah 1:11

12And Y seide, Y se a yerde wakynge. And the Lord seide to me, Thou hast seen wel, for Y schal wake on my word, to do it.Select Jeremiah 1:12

13And the word of the Lord was maad the secounde tyme to me, and seide, What seest thou? Y se a pot buylynge, and the face therof fro the face of the north.Select Jeremiah 1:13

14And the Lord seide to me, Fro the north schal be schewid al yuel on alle the dwelleris of the lond.Select Jeremiah 1:14

15For lo! Y schal clepe togidere alle the naciouns of rewmes of the north, seith the Lord, and thei schulen come, and sette ech man his seete in the entryng of the yatis of Jerusalem, and on alle the wallis therof in cumpas, and on alle the citees of Juda.Select Jeremiah 1:15

16And Y schal speke my domes with hem on al the malice of hem, that forsoken me, and maden sacrifice to alien goddis, and worschipiden the werk of her hondis.Select Jeremiah 1:16

17Therfor girde thou thi leendis, and rise thou, and speke to hem alle thingis whiche Y comaunde to thee; drede thou not of the face of hem, for Y schal not make thee for to drede the cheer of hem.Select Jeremiah 1:17

18For Y yaf thee to dai in to a strong citee, and in to an yrun piler, and in to a brasun wal, on al the lond, to the kyngis of Juda, and to the princis therof, and to the preestis therof, and to al the puple of the lond.Select Jeremiah 1:18

19And thei schulen fiyte ayens thee, and thei schulen not haue the maistrie; for Y am with thee, seith the Lord, that Y delyuere thee.Select Jeremiah 1:19