16John 16

1These thingis Y haue spokun to you, that ye be not sclaundrid.Select John 16:1

2Thei schulen make you with outen the synagogis, but the our cometh, that ech man that sleeth you, deme that he doith seruyce to God.Select John 16:2

3And thei schulen do to you these thingis, for thei han not knowun the fadir, nether me.Select John 16:3

4But these thingis Y spak to you, that whanne the our `of hem schal come, ye haue mynde, that Y seide to you.Select John 16:4

5Y seide not to you these thingis fro the bigynnyng, for Y was with you. And now Y go to hym that sente me, and no man of you axith me, Whidur `thou goist?Select John 16:5

6but for Y haue spokun to you these thingis, heuynesse hath fulfillid youre herte.Select John 16:6

7But Y seie to you treuthe, it spedith to you, that Y go; for if Y go not forth, the coumfortour schal not come to you; but if Y go forth, Y schal sende hym to you.Select John 16:7

8And whanne he cometh, he schal repreue the world of synne, and of riytwisnesse, and of doom.Select John 16:8

9Of synne, for thei han not bileued in me;Select John 16:9

10and of riytwisnesse, for Y go to the fadir, and now ye schulen not se me;Select John 16:10

11but of doom, for the prince of this world is now demed.Select John 16:11

12Yit Y haue many thingis for to seie to you, but ye moun not bere hem now.Select John 16:12

13But whanne thilke spirit of treuthe cometh, he schal teche you al trewthe; for he schal not speke of hym silf, but what euer thinges he schal here, he schal speke; and he schal telle to you tho thingis that ben to come.Select John 16:13

14He schal clarifie me, for of myne he schal take, and schal telle to you.Select John 16:14

15Alle thingis `whiche euer the fadir hath, ben myne; therfor Y seide to you, for of myne he schal take, and schal telle to you.Select John 16:15

16A litil, and thanne ye schulen not se me; and eftsoone a litil, and ye schulen se me, for Y go to the fadir.Select John 16:16

17Therfor summe of hise disciplis seiden togidere, What is this thing that he seith to vs, A litil, and ye schulen not se me; and eftsoone a litil, and ye schulen se me, for Y go to the fadir?Select John 16:17

18Therfor thei seiden, What is this that he seith to vs, A litil? we witen not what he spekith.Select John 16:18

19And Jhesus knew, that thei wolden axe hym, and he seide to hem, Of this thing ye seken among you, for Y seide, A litil, and ye schulen not se me; and eftsoone a litil, and ye schulen se me.Select John 16:19

20Treuli, treuli, Y seie to you, that ye schulen mourne and wepe, but the world schal haue ioye; and ye schulen be soreuful, but youre sorewe schal turne in to ioye.Select John 16:20

21A womman whanne sche berith child, hath heuynesse, for hir tyme is comun; but whanne sche hath borun a sone, now sche thenkith not on the peyne, for ioye, for a man is borun in to the world.Select John 16:21

22And therfor ye han now sorew, but eftsoone Y schal se you, and youre herte schal haue ioie, and no man schal take fro you youre ioie.Select John 16:22

23And in that day ye schulen not axe me ony thing; treuli, treuli, `Y seie to you, if ye axen the fadir ony thing in my name, he schal yyue to you.Select John 16:23

24`Til now ye axiden no thing in my name; `axe ye, `and ye schulen take, that youre ioie be ful.Select John 16:24

25Y haue spokun to you these thingis in prouerbis; the our cometh, whanne now Y schal not speke to you in prouerbis, but opynli of my fadir Y schal telle to you.Select John 16:25

26In that dai ye schulen axe in my name; and Y seie not to you, that Y schal preye the fadir of you;Select John 16:26

27for the fadir hym silf loueth you, for ye han loued me, and han bileued, that Y wente out fro God.Select John 16:27

28Y wente out fro the fadir, and Y cam in to the world; eftsoone Y leeue the world, and Y go to the fadir.Select John 16:28

29Hise disciplis seiden to hym, Lo! now thou spekist opynli, and thou seist no prouerbe.Select John 16:29

30Now we witen, that thou wost alle thingis; and it is not nede to thee, that ony man axe thee. In this thing we bileuen, that thou wentist out fro God.Select John 16:30

31Jhesus answeride to hem, Now ye bileuen.Select John 16:31

32Lo! the our cometh, and now it cometh, that ye be disparplid, ech in to hise owne thingis, and that ye leeue me aloone; and Y am not aloone, for the fadir is with me.Select John 16:32

33These thingis Y haue spokun to you, that ye haue pees in me; in the world ye schulen haue disese, but trust ye, Y haue ouercomun the world.Select John 16:33